Kulis.az Gülbacı Nağdalıyevanın yeni şeirlərini təqdim edir.

Yaşamıram

Yaşamıram bu dünyada,

Uğursuz vaxt keçirirəm.

Gilə-gilə əriyirəm,

İlmə-ilmə kiçilirəm.

Ovunmaz uşaq kimiyəm,

Çətin ki susam, kiriyəm..

Külək vurmuş bir zəmiyəm,

Tərs-köndələn biçilirəm.

Yol nabələd, mənsə naşı,

Yıxılıram addımbaşı...

Düz gəlmir tərəzim, daşım,

Qram-qram ölçülürəm.

Sevincim kəm, dərdlər qoşa,

Varmadım heç nədə başa.

Tanrım, bax, eylə tamaşa,

Gör ki, necə seçilirəm...

Ay Gülbacı, üzülürəm,

Buz baxışdan əzilirəm.

Şərbət olub süzülürəm,

Zəhər kimi içilirəm...

Gəlmişəm

Çəkmə məni imtahana

Tanrıdan keçib gəlmişəm.

Kəfənliyim saf niyyətdən,

Boyuma biçib gəlmişəm.

Sovruldum yaz küləyində,

Nə qaldı ki, ələyimdə?

Nələr varsa taleyimdə,

Bəyənib, seçib gəlmişəm.

Anamın bal laylasına,

Şeir, sənət dünyasına,

"Baş Sarıtel" havasına

Köklənib, uçub gəlmişəm.

Həyatımın hər anında,

Yanılmadım gümanımda.

Haqqı Haqqın mizanında

Tapmışam, ölçüb gəlmişəm.

Yetsə bir gün ömür sona,

Budur sözüm Yaradana:

-Təmiz göndərdin cahana,

Elə də köçüb gəlmişəm.

Bu dünya

Olan - olmazını alıb əlindən

Çalar qismətini daşa bu dünya.

Çıxsan haq yolundan çətin barışa,

Baxmaz gözündəki yaşa bu dünya.

Şeytandan bac alır, tükənməz şəri,

Nizam tərəzisi haqqın məhşəri.

Yox edər bir anda bütün bəşəri,

Verməz bir anını boşa bu dünya.

Laxlasa məhvəri, verməz namını

Zəhərə çevirər şərbət camını.

Ummadığın yerdən töküb qanını,

Tuşlayar oxunu başa bu dünya.

Nahaqdan haqqa yol ölümdən keçər,

Zalımın nəsibi zülümdən keçər.

Gülbacı, bir sual könlümdən keçər:

-Kim görüb bircə yol çaşa bu dünya?!

***

Axırı bir heyif , bir heç uğruna

Vicdanın ipliyi , bağı sökülür.

Baxıb yerlərdəki bu yığhayığa,

Göylərin üzünün suyu tökülür.

Tanrı da çaşqındı yaratdığına,

"Dünya düzəlmir ki, düzəlmir baba!"

***

Yenə fikirlərim pərən-pərəndi,

Yenə gümanlarda "bəlkə..." aradım.

Xal saldılar güvənimə yer-yerdən,

Qırılmadı kor olası inadım.

Heç oldu gözümdə dünyanın varı,

İmanla gedirəm O Haqqa sarı.

"Dostam" deyənlərin yox etibarı,

Yana-yana, dönə-dönə sınadım.

Gülbacı, bir zaman ayılıb gördüm,

Günahkar özüməm, yox özgə dərdim.

Barama qurdu tək əyirib-hördüm,

İpi öz boynuma özüm doladım.

Apardı getdi

Bostan əkdim seltutanda bilmədim

Sellər apardı, getdi.

Çox güvəndim gəncliyimə, zamanla

İllər apardı, getdi.

Nağıllar uydurdum söz dünyasından,

Gec ayıldım xəyallar röyasından.

Qeys "Məcnun" oldu eşq havasından,

Çöllər apardı, getdi.

Gəl, sınağa çəkmə amallarımı,

Gülbacı, istəmə dünya malını.

Dağlar çəkəmməzdi arzularımı,

Yellər apardı, getdi.

• Musa Nağıyevin evi 2 milyona satışa çıxarıldı
• Qulu Ağsəsin yeni kitabının təqdimat mərasimi keçiriləcək
• "Bəlkə, əynindəki mundirinə görə onunla xoş danışdılar?" - İsi Məlikzadənin "Evin kişisi" povestindən bir hissə