1949-cu ilin oktyabrında kitabxanadan götürülən kitab 77 ilə yaxın vaxt keçdikdən sonra nəhayət ki, geri qaytarılıb.

Kulis.az xəbər verir ki, Patrik Donkasterin qələmə aldığı "Şeytan tuzları əlində saxlayırdı" adlı əsər ötən həftə çardaqda tapıldıqdan sonra Norfolk Qraflıq Şurasının səyyar kitabxana xidmətinin əməkdaşına təhvil verilib.

Feysbukda paylaşılan fotolarda kitabın Norviçdəki Mayl Kross filialına aid olduğu və üzərində 10 oktyabr 1949-cu il tarixli möhürün vurulduğu görünür.

Şuradan verilən məlumata görə, həmin vaxt vaxtı keçmiş kitab üçün cərimə həftədə 1 penni idi. İnflyasiya nəzərə alındıqda bu məbləğ bu gün təxminən 800 funt-sterlinqə bərabərdir. Lakin kitabxana rəhbərliyi bu dəfə istisna edərək cəriməni ləğv etmək qərarına gəlib. Müqayisə üçün qeyd edək ki, hazırda gecikdirilən kitaba görə cərimə gündəlik 20 penni təşkil edir və 28 gündən sonra maksimum 5,60 funt-sterlinq həddində dayanır.

Bu qədim kitabın ön hissəsindəki qaydalarda əsərin cəmi 14 gün müddətinə verildiyi qeyd olunub. Kitabxananın sözçüsü isə əsər geri qaytarıldıqdan dərhal sonra iki həvəskar oxucunun onu oxumaq üçün artıq sifariş etdiyini bildirib.

Şuranın səyyar kitabxanalar üzrə meneceri Uill Büler baş verənlərlə bağlı təəssüratlarını belə ifadə edib:

"Bu qayıdış sözsüz ki, bizi çox təəccübləndirdi, lakin ən gözəl şəkildə. Düşünmək istəyirik ki, o, çardaqdakı bir qutuda və ya kiminsə sevimli kitab rəfində olmasından asılı olmayaraq, maraqlı bir 'həyat' yaşayıb. Onu yenidən evdə salamlamaq çox gözəldir".

Müharibə dövründən bəhs edən bu əsər jurnalist və yazıçı Patrik Donkasterin nəşr olunan ilk romanı olub. Kitabxana xidmətindən həmçinin vurğulanıb ki, bu, kitabların uzun illər sonra geri qaytarılması ilə bağlı qarşılaşdıqları ilk hadisə deyil:

"2018-ci ildə "Piter Rebbit" kitabı 49 il gecikmə ilə qaytarılmışdı. Bundan qısa müddət sonra isə bir evin təmiri zamanı döşəmənin altından 1928-ci ilin noyabrında təhvil verilməli olan başqa bir kitab tapılmışdı. Cərimələrə faiz hesablamamağımız həqiqətən də oxucuların xeyrinədir".

• Mikayıl Müşfiqin xatirəsi anıldı
• Hər səhər ovcumdan doğdu Günəş də - Tural Turanın yeni şeirləri
• “Urban Expo” sərgisində Meksika pavilyonunun açılışı oldu