Rassel Krou rejissor Ridli Skottun 2024-cü ildə çəkdiyi "Qladiator" filminin davamını bəyənməyib və bu epik ekran işini uğursuzluq adlandırıb.

Kulis.az xəbər verir ki, aktyor yeni filmin orijinalın irsinə xələl gətirdiyini vurğulayıb.

Hazırda 62 yaşı olan Krou 2000-ci ildə Konni Nilsen və Xoakin Feniks ilə birlikdə orijinal "Qladiator" filmində baş rolu canlandırmışdı. Eramızın II əsrində Romanın qüdrətli sərkərdəsi, sadiq və məğrur Maksimus obrazı ona "Ən yaxşı aktyor" nominasiyasında "Oskar" qazandırmışdı. Aktyor Pol Meskal və Denzel Vaşinqtonun baş rollarını bölüşdüyü ikinci filmdən isə olduqca məyusdur.

"O, məqsədindən yayınıb kiminləsə yatağa girə bilməzdi"

"Deadline" nəşrinin məlumatına görə, Taormina Kinofestivalında çıxış edən Krou birinci "Qladiator" filminin çəkilişləri zamanı obrazının intim səhnələrinin olmasına kəskin etiraz etdiyini xatırlayıb:

"Mən onlara dedim: "Bu, arvadının və övladının ölümünün qisasını alan bir adamın hekayəsidir. Bu yolda onun dayanıb kiminləsə cinsi əlaqədə olduğu bir an ola bilməz. Bunun heç bir mənası yoxdur... bu, onun keçdiyi çətin yolu məhv edər".

Aktyor qeyd edib ki, kino studiyası onunla mübarizə aparıb və hətta bununla bağlı ona məktublar da göndərib. Lakin Krou öz mövqeyindən geri çəkilməyib:

"Xoşbəxtlikdən, Ridli mənimlə Konni Nilsen arasında intim səhnə çəkməyi nə qədər çox istəsə də, o vaxt mənimlə razılaşdı və filmin əxlaqi mərkəzi məhz bu cür qorunub saxlanıldı".

Davam filmindəki ziddiyyətli süjet xətti

Ssenarisi Devid Skarpa tərəfindən yazılan və 24 il sonra ərsəyə gələn davam filmi isə Krounun fikrincə, həmin əxlaqi mərkəzi darmadağın edib.

Filmdə Pol Meskal Maksimusun qeyri-qanuni oğlunu canlandırır. Krou hesab edir ki, bu süjet xətti onun obrazının xarakteri ilə tamamilə ziddiyyət təşkil edir. Çünki bu, Maksimusun arvadının qisasını aldığı və ona sadiq qaldığı bir vaxtda başqa bir qadınla romantik münasibətdə olduğunu göstərir.

Kassa gəlirləri: Uğur, yoxsa uğursuzluq?

Rassel Krou yeni filmin kassa yığımlarına da diqqət çəkərək onun maddi baxımdan da uğursuz olduğunu iddia edib. Müqayisə üçün qeyd edək ki, Birinci "Qladiator" (2000-ci il) 466 milyon dollar kassa gəliri, İkinci "Qladiator" (2024-cü il) 462,2 milyon dollar kassa gəliri əldə edib.

Krou vəziyyəti belə izah edib:

"Bu, çox maraqlıdır, çünki ikinci film kassa yığımlarında birincidən demək olar ki, geri qalmadı. Ancaq aradan keçən 20 ildən çox vaxtı, inflyasiyanı və dolların dəyərindəki dəyişikliyi nəzərə alsaq, onlar uğursuzluğa düçar oldular. Uğursuz oldular, çünki orijinal filmin niyə uğur qazandığını anlamadılar. Birinci filmin dərin bir əxlaqi mərkəzi var idi".

"Bu, sadəcə quru intiqam deyil, haqq-ədalət məsələsi idi"

Aktyor qeyd edib ki, orijinal filmin uğurunun sirri onun həm qadınları, həm də kişiləri cəlb edən köhnə üslublu "qisas" hekayəsi olmasındadır:

"Zahirən "Qladiator" kişilər üçün çəkilmiş bir filmdir. Lakin əgər o, yalnız kişilər üçün olsaydı, mövzusu sadəcə quru intiqam olardı. Ancaq bu film sadəcə intiqam haqqında deyil. Bu, həm də qadınlar üçün bir filmdir, çünki burada məsələ haqq-ədalət naminə qisas almaqdır. Bu, çox incə, amma vacib bir fərqdir. Mənə lazım idi ki, obraz məhz bu cığırla irəliləsin".

• Rus rəssamlığının "Böyük Karl"ı - O, niyə İtaliyaya mühacirət etmişdi?
• Bəstəkar Elnar Məmmədovun xatirəsi anıldı
• İntihar edən ata, şizofren həyat yoldaşı, kətan üzərindəki Nyu-York - Franz Klayn kim idi?