1997-ci ildə ekranlara çıxan və bütün dünyada səs-küy yaradan "Titanik" filminin baş rol ifaçıları tərəfindən imzalanmış ssenarisi hərracda 620 funt-sterlinqə satılıb.

Kulis.az xəbər verir ki, ssenari Şimali Somersetdəki "Klivdon Seylrums" hərrac evində satışa çıxarılıb.
​

Uzun illər ərzində toplanmış şəxsi kolleksiyanın bir hissəsi olan bu sənədin üzərində Hollivud ulduzları Leonardo DiKaprio, Keyt Uinslet, Billi Zeyn, Keti Beyts, Qloriya Stüart və filmin əfsanəvi rejissoru Ceyms Kemeronun orijinal imzaları yer alır.

​Hərracın qiymətləndiricisi Henri Mişallat bildirib ki, bu imzalar şanslı bir pərəstişkara tarixin ən böyük filmlərindən biri ilə fiziki bağ qurmağa imkan verib. O, çıxışında bu sözləri əlavə edib:
​

"Mebel, keramika və geyim kimi adətən çox yüksək qiymətə satılan digər 'Titanik' xatirə əşyaları ilə müqayisədə, ssenarilər hərraca o qədər də tez-tez çıxarılmır. Buna görə də, bu nüsxə bir pərəstişkar üçün həqiqətən də mükəmməl və sərfəli bir əşya idi".
​

​Məlumata görə, imzalı ssenari "Starpauer Avtoqrafs" tərəfindən verilmiş orijinallıq sertifikatı ilə birlikdə təqdim olunub. Hərrac zamanı nüsxəni əldə etmək üçün üç nəfər arasında olduqca gərgin mübarizə gedib.

Qeyd edək ki, blokbaster 1912-ci ildə ilk səyahəti zamanı batan "Titanik" gəmisində fərqli sosial təbəqələrdən olan Cek və Rouzun faciəvi sevgi hekayəsindən bəhs edir. Ekran işi qlobal kassa yığımlarında 1 milyard dollar səddini keçən ilk film kimi tarixə düşüb və ümumilikdə 2,2 milyard dollardan çox gəlir gətirib.

​"Titanik" rejissor Ceyms Kemeronun digər şedevri "Avatar" 2009-cu ildə bu göstəricini geridə qoyana qədər 12 il ərzində bütün dövrlərin ən çox gəlir gətirən filmi titulunu qoruyub saxlamışdı.

• Mənim sevgim alicənab bir dəlilikdir... - Con Drayden
• “Oskara”a namizəd aktyorun yeni layihəsi açıqlandı
• Məşhur müğənni əməliyyat olundu