20 avqust Azərbaycanın görkəmli rəssamı Tofiq Cavadovun anım günüdür.

Kulis.az bu münasibətlə rəssamın həyat və yaradıcılığı ilə bağlı maraqlı faktları təqdim edir.

Tofiq Mirhaşım oğlu Cavadov (Mircavadov) 7 fevral 1925-ci ildə Bakıda anadan olub.

O, 1945–1948-ci illərdə Sovet Ordusunda hərbi xidmətdə olub, daha sonra isə 1948–1952-ci illərdə Əzim Əzimzadə adına Azərbaycan Dövlət Rəssamlıq Məktəbində rəngkarlıq fakültəsində təhsil alıb.

Burada o, Əyyub Məmmədov, Əbdül Xalıq, Əyyub Hüseynov və Baba Əliyev kimi tanınmış rəssamlardan dərs alıb.

Cavadovun sənət yolu 1950-ci illərin ikinci yarısından neorealizm mərhələsi ilə başlayır.

Onun bu dövrə aid əsərləri əsasən neft və ağır sənayeyə həsr olunmuşdu. “Neftçilər”, “Sənaye mənzərəsi”, “Operator qız”, “Neftçi”, “Poladəridən sexdə” və “Poladəridənin portreti” tabloları həmin illərin məhsuludur.

1955–1956-cı illərdən isə rəssamın yaradıcılığında “Buzovna dövrü” başlayır.

Bu mərhələdə o, “Buzovnada küçə”, “Kənd mənzərəsi”, “Buzovna aşırımı” və digər Abşeron mənzərələrini yaradıb.

1959–1961-ci illərdə “Avtoportret” əsərini çəkib. 1963-cü ildə isə Rasim Babayev və Fazil Nəcəfovla birlikdə “Göyərçin” uşaq jurnalının bədii tərtibatını həyata keçirib. Rəssamın sonuncu böyük əsəri “Külək” tablosu olub.

Tofiq Cavadov 20 avqust 1963-cü ildə Moskva–Serpuxov elektrik qatarının Çepelyova stansiyasında baş verən qəza nəticəsində vəfat edib. O, Azərbaycan təsviri incəsənətində özünəməxsus üslubu ilə yadda qalıb.

• Aygün Kazımovanın məşhur mahnısı "Avroviziya"da
• "Pul xatirinə alçaqlıq etməyə ehtiyac yoxdur..." - Balzakın "Qobsek" novellasından bir hissə
• "Guya ki, mövzuları cibindən çıxardırdı..." - Əbdürrəhim bəy Haqverdiyev Mirzə Cəlil haqqında nə yazmışdı?