Rejissor Zak Kreggerin lentə aldığı yeni "Resident Evil" filmi nümayiş olunduğu ilk həftəsonunda dünya üzrə 108,3 milyon dollar gəlir əldə edərək franşiza tarixində ən yüksək açılış göstəricisinə imza atıb.

Kulis.az xəbər verir ki, bu barədə "Deadline" nəşri məlumat yayıb.

Ekran işi eyni zamanda Kreggerin rejissorluq karyerasında ən güclü açılış edən film olub.

"TriStar Pictures", "Constantin Film" və "Davis Films" şirkətlərinin müştərək istehsalı olan layihə sentyabrın 18-dən 20-dək olan ilk həftəsonunda Şimali Amerikada 60 milyon dollar, beynəlxalq bazarlarda isə 48,3 milyon dollar gəlir toplayıb. Beləliklə, qorxu filminin qlobal açılış qazancı 108,3 milyon dollara çatıb.

Bu rəqəm 2002-ci ildə başlayan və kulta çevrilən ekran seriyasının əvvəlki bütün açılış rekordlarını geridə qoyub. Yeni filmin təkcə üç günlük açılış gəliri 2002-ci ildə çəkilən ilk "Resident Evil" filminin bütün nümayiş müddətində topladığı ümumi məbləği (təxminən 103 milyon dollar) və 2021-ci il istehsalı olan "Resident Evil: Rakun-Sitiyə xoş gəldiniz" (Welcome to Raccoon City) filminin qlobal qazancını (41,9 milyon dollar) üstələyib.

Bununla belə, seriyanın qlobal miqyasda ən çox gəlir gətirən filmi titulu hələ də 2016-cı il istehsalı olan "Resident Evil: Sonuncu fəsil" (The Final Chapter) ekran işinə məxsusdur. Həmin film prokatda təxminən 312 milyon dollar toplaya bilmişdi. Yeni ekran işinin bu ümumi rekordu qırıb-qıra bilməyəcəyi yaxın həftələrdə bəlli olacaq.

Filmin beynəlxalq bazarlardakı ən yüksək göstəriciləri Böyük Britaniya və İrlandiyadan (5,8 milyon dollar), eləcə də Meksikadan (5,6 milyon dollar) gəlib. Layihənin Asiya bazarlarında, xüsusən də oyunun vətəni sayılan Yaponiyada oktyabrın 9-da vizyona girəcəyi nəzərə alınarsa, kassa yığımının daha da kəskin artacağı gözlənilir.

Zak Kreggerin kassa uğurları

"Resident Evil" filmi Zak Kreggerin rejissor kimi Hollivuddakı mövqeyini daha da möhkəmləndirib. 2022-ci ildə çəkdiyi "Vəhşi" (Barbarian) adlı psixoloji qorxu filmi ilə bütün diqqətləri üzərinə çəkən rejissor ötən il (2025) işıq üzü görən "Silahlar" (Weapons) filmi ilə qlobal miqyasda 70 milyon dollarlıq açılış etmişdi. Yeni "Resident Evil" isə 108,3 milyon dollarlıq nəticə ilə bu rəqəmi də xeyli geridə qoyaraq rejissorun ən gəlirli debüt layihəsinə çevrilib. Tənqidçilər Kreggerin seriyanı əvvəlki filmlərin sırf ekşn xəttindən uzaqlaşdırıb orijinal oyunların klostrofobik və qorxu elementlərinə qaytarmasının bu kommersiya uğurunda mühüm rol oynadığını bildirirlər.

• Nəsiminin ürəyi tapıldı – şairin sonrakı taleyi, yaxud Şamaxı zəlzələdən sonra - “NƏSİMİ BAĞLARI”NDAN REPORTAJ - VİDEO
• Bir yöndəmsiz birəyə görə köynəyi dəyişərlər? - Lalə Bağırova
• "Ədəbiyyatın alicənab bir məfkurə olduğu inancı ilə böyümüşəm..." - Oskar İxuelos