QALİB ŞƏFAHƏT

***

Dizinə kimi mazuta batan,

ağzına toz-torpaq dolan,

geniş saraylardan xoşbəxt görünən,

özü-öz içində boğulan,

ölənlə ölən - Bakım.

Hər yeni doğulanla,

yeni doğulan Bakım.

Dünya sənə güvənir,

sən mazutlu dizlərinə.

Səni xoşbəxt görmək istəyəni,

sən bədbəxt elədin.

Afərin!

Allah sənə şəfa versin -

yoxsulun kor olmuş

gözləri kimi

işıq gəlsin gözlərinə.

QOL – BOYUN OLAQ

Mənim köynəyimin qolu yox

sənin köynəyinin boyunluğu.

Aramızda sərhəd yox

bir köynək də -

yad deyilik daha.

Qolumu boynuna

Dolayım, ya yox?!.

Qorxuram qolum

boynundan ayrılmaya

yaxınını illərdən sonra

tapmış

insanlar kimi.

Qorxmuram - qolum boynunda qala -

Qorxuram qolum boynunda qala.

Qolsuz qalım, ya ürəksiz?

Məndən qol, səndən boyun

Qolum boynunda qala -

Qol-boyun olaq.

YUXUMDA BİR İT HÜRÜR

Yuxumda bir it hürür -

çöldə qar-borandı yenə.

Yuxumda bir it hürür -

bir qız ah-naləsi

çökür içimə.

Yuxumda bir it hürür.

Yalquzaq tək çəkilmişəm

dünyanın bir küncünə.

Yuxumda bir it hürür -

tək-tənhayam yenə,

çəkilmişəm tənhalığıma, təkliyimə.

Yuxumda bir it hürür -

içim qürbətdi yenə.

Yuxumda bir it hürür -

Eh!..

Nə deyim sənə

Yuxuma it azdıran.

• Britaniya Film Akademiyası bu şəxsləri mükafatdan məhrum edəcək
• Tərəf müqabili oldular
• Azərbaycan Qazaxıstanda teatr festivalında təmsil olunur