Avtobusların içindəkilərdən daha xoşbəxt göründüyü şəhərdə dolaşmaq məmnunluğu yaşayıram. Adamın ağlına parlaq bir fikir gələndə yaşadığı hisslərə bənzəyir bu duyğu. Belə bir hissi yaşamayan oxucu üçün başqa bir misal çəkim: elə bil bərbərxanaya saçını qırxdırmaq üçün deyil, güzgünün sağ-soluna vurulan model şəkilləri üçün getmisiz. Amma məsələ bu deyil, bu dəfə səndən yazacam, dükanların 1 qəpik ucuza satdığı malların xətrinə yazmıram.

İnsanların üzlərində “Məni tanıyırsan?!” sualını oxuyacaq qədər xoşbəxt idim. Səni düşünəcəkdim, üzərində böyük hamburger şəkli vurulmuş maşın gözümün qabağını kəsməsəydi. Adam bəzən doğmalarından daha çox ayran qutularını görür. Məsələn, mən səni şirələrdən, “İce tea”lərdən daha az tanıyıram. TV-lərdə qonaqların sözünü kəsən reklamlar, küçələrdə birbaşa insanların düşüncələrini, duyğularını hətta qərarlarını belə dəyişdirir. Keçək ən önəmli məqama, bu dəfə səndən yazacam, tənhalıqdan üşüyən insanın qarderobda axtardığı isti paltarın xətrinə yazmıram.

Hər birimiz şok xəbərlərini oxuyaraq, dinləyərək, izləyərək gündəlik həyatımızı yaşayırıq. ŞOKoladların kalorisi qədər reytinq gətirən belə xəbərin biri beynimin bir küncündə, biri yanımdan sürətlə ötüb keçən gəncin cibinə qoyduğu sıxılmış ovcunda, birini də Google-də yazıb taparsınız. Mən isə bu dəfə səndən yazacam, 2-3 metrlik cığırı qol-qola girərək yolu tamamilə kəsən dörd gözəl qızın xətrinə yazmıram.

Yadımdadı, orta məktəbdə inşa yazılarındakı mövzulardan biri “Arzunuz nədir?” olardı. Mövzu verilən kimi ağlımıza ilk gələn cümlə “Arzudan arzu doğur” fikri idi. Bu mövzunun indi də qaldığına əminəm, amma kiminsə belə düşüncədə olacağına inanmıram. Çünki bir arzunun gerçəkləşməsi 20 illik bank müqaviləsi nəticəsində olursa, zibilliklər, hirslə cırılmış lotoreyalar, Topaz biletləri ilə dolursa, günlər günəbaxan tumlarının kuponlarını toplamaqla keçirsə, üzü daim “parçalı-buludlu” dolaşan insanlar varsa arzudan arzu deyil, olsa olsa adı “Arzu” olan dükanlar yaranacaq. E-manatın qəbz vermədiyi bu günlərdə səndən yazacaqdım, qadın göz yaşları kimi axan ulduzların xətrinə yazmıram.

• Xəyal Rzanın filmi təqdim olunacaq
• Dədə Qorqud casus olub? - Zəhra Həşimova
• Dilinin bəlasına düşən dünya şöhrətli yazıçı