Dekabrın 6-da Dövlət Pantomima teatrında yeni tamaşanın premyerası keçirilib. Kulis.az-ın verdiyi məlumata görə tamaşanın rejissoru Bəxtiyar Xanızadə və Bəhruz Vaqifoğludur.

Klounada janrında olan “Son ştrix” yaradıcı və dağıdıcı insanlardan bəhs edir. Artıq qocalmış bir kloun yorulmadan yaratmaq həvəsindədir. Amma ona qoşulan, ondan ayrılan, onu ələ salan, onun qurduğunu dağıdan klounlar da var.

Qoca kloun rolunu Bəhruz Vaqifoğlu oynayır. O, bu rolda ustadı, rejissor Bəxtiyar Xanızadəni düşündüyünü söyləyir: “Hər dəfə özündə bir qüvvə tapıb yaratmaq həvəsində olan qoca kloun bu dəfə öz daxili aləmini yaradır: qara parça altında bir çox formalara düşən obrazın üstü açılanda onun altında ağ geyimli məsum sifətli birini görürük. Qoca ona kitab verir, balaca radiosundan öz zövqünə uyğun bir musiqi səsləndirir, ağ geyimli obraz həvəslə kitabdan şeir oxumağa başlayır. Qoca daha da həvəsə gəlib onun üçün dibçəkdə gül gətirməyə gedir. Bu zaman dağıdıcı klounlar peyda olur. Bu ağ məsum obraza öz xarakterlərini köçürməyə başlayırlar. Axırda bizim ağ və təmiz gördüyümüz obraz vəhşi birinə çevrilir... Amma yaratmaq həvəsi olan qoca bu səfər Nəsimidən təkan alır və tamaşa “gedən cismimdir ruhum sizinlədir” sözləri ilə bitir...”

Gənc rejissor da premyera həyəcanı haqqında belə deyib: “Teatrın “premyera ənənəsinə” uyğun olaraq, iki gün ərzində sonra tamaşaçılarla müzakirə də keçirildi. Tamaşaçılar arasında Oqtay Mirqasımov, Şamil Nəcəfzadə, Sənubər İsgəndərli, Fəxrəddin Manafov, Oqtay Əliyev, Dilarə Əliyeva, Rövşən İsax kimi tanınmış simalar vardı. Həmişəki kimi hər şey min dəfə ölçülüb biçilmişdi. Bəxtiyar müəllim buna çox inandı, məndə bir balaca inamsızlıq vardı; tamaşa çox asta tempdə gedir - bildiyiniz kimi ki, bu gün insanların həyat ritmi çox sürətlidir, templi bir həyat yaşayırıq. Tamaşaçı buna hövsələ göstərəcəkmi? Amma müsbət fikirlər aldıq..."

Xatırladaq ki, “Son ştrix” tamaşasının növbəti nümayişi dekabrın 13-ə nəzərdə tutulub.

• Erməni söhbəti mətnə banallıq qatır - Hekayə müzakirəsi
• Puşkin muzeyinə yeni direktor təyin edildi
• Xaricdəki Azərbaycan Evlərində xatirə guşələri yaradıldı