Dünya şöhrətli "Yunona və Avos” rok-operasını artıq Azərbaycan tamaşaçıları da görmək imkanı qazanacaqlar. Belə ki, martın 31-də Heydər Əliyev Sarayında bu operanın Bakı premyerası olacaq.

"Yunona və Avos” rok-operası Rusiya Federasiyasının xalq artisti, dövlət mükafatı laureatı, bəstəkar Aleksey Rıbnikovun rəhbərlik etdiyi teatrın müəllif versiyasıdır. Rusiya səhnəsində ən məşhur rok-opera olan "Yunona və Avos”un müəllifləri görkəmli rus bəstəkarı Aleksey Rıbnikov və şair Andrey Voznesenskidir.

Məlumat üçün deyək ki, "Yunona və Avos” rok-operası dünya musiqili teatr tarixində ən böyük nailiyyətlərdən hesab olunur. Rus dini musiqisi, xalq folkloru, kütləvi "şəhər musiqisinin” janrları, modern musiqi nümunələri ilə bəstəkarın ideya-estetik prioritetlərinin vəhdətindən yaranan rok-operanın yeni versiyasında əsas amil Aleksey Rıbnikovun musiqisidir.

Rok-operanın vokal nömrələrini Rusiyanın əməkdar artisti, Rıbnikovun operalarında, həmçinin sovet kinosunun şlyagerlərində əsas partiyaların ifaçısı məşhur aktrisa Janna Rojdestvenskaya ifa edir. "Buratnio”, "Prodüserlər” kimi müzikllərin xoreoqrafı olmuş Janna Şmakovanın quruluşunda "Yunona və Avos” tamaşasındakı mükəmməl rəqs nömrələri sənət əsərinin daha da maraqlı və baxımlı olmasına zəmanət verir.

Aleksey Rıbnikovun "Yunona və Avos” rok-operası Rusiyadan başqa, Ukraynada, Qazaxıstanda, Fransada, İsraildə və digər ölkələrdə uğurla nümayiş olunub.

Qeyd edək ki, tamaşanın Bakı nümayişi üçün biletlər artıq satışdadır və qiymətlər 30 AZN-dən başlayır.

TeatrPlyus.Az

• “Gəlinlərin savaşı” tamaşasının premyerası oldu
• Lənkəranda sənət hadisəsi - "Gəlinlik paltarı"nın səhnə təntənəsi
• Odlanarsan, qurban olum, uzaqda dur, yaxşımı? - Səbinə Xasıyevanın şeirləri