Bu gün tanınmış Braziliya yazıçısı Jorje Amadunun anım günüdür.

Kulis.az onun əsərlərindən sitatları təqdim edir.

Öz ağlıyla yaşamaq, öz başıyla düşünmək bahalı zövqdür. Buna cəsarət edən kəs dərhal sağların və solların ideoloji patrulları tərəfindən yaxalanacaq və rəhm gözləməsin. İttiham edəcəklər, tüpürəcəklər, böhtan atacaqlar, rüsvayçılıq dirəyinə bağlayacaqlar, çarmıxa çəkəcəklər. Amma hər halda — bu həddindən artıq baha qiyməti ödəməyə dəyər, çünki uduzan tərəf olmayacaqsan: fikir azadlığı əvəzsiz bir şeydir.

***

Elə bir an gəlir ki, sevdiklərinin, dostluq etdiklərinin böyük əksəriyyətinin artıq o dünyada olduğunu, sənin isə bir anlaşılmazlıq ucbatından hələ də burada qaldığını anlayırsan.

***

Hər halda, əziz dostum, hamımız müəllifi bəlli olmayan bir romançının qələmə aldığı personajlarıq...

***

Xilaskardan işğalçıya qədər cəmi bir addım var — əsgər çəkmələrinin bir addımı.

***

Mən həmişə iddia etmişəm ki, xarici dilləri ən yaxşı öyrənmə yeri çarpayıdır — dodaqdan dodağa, qrammatika qaydalarının məhəbbət iniltilərinə qarışdığı anlarda...

***

Azadlıq günəş kimidir. Dünyada ondan daha əzəmətli və gözəl heç nə yoxdur.

***

Məhəbbət həmişə şirin və mərhəmətlidir, hətta ölüm tam böyründə olsa belə...

***

Məşuqəni axtararkən ölmək məgər qorxuludur? Məhəbbətə doğru üzərkən boğulmaq məgər dəhşətlidir?

***

Taledən qaçmaq olmaz, - deyə qoca bildirdi. — Sənin taleyin bax orada həll olunur, — deyib harasa yuxarıya tərəf işarə etdi.

***

O, həddindən artıq gözəldir və sırf buna görə də şər saçır.

***

Həyat fərəhli, bədən doymuş, yemək dadlı və bol, ruh sakit olanda nə gözəldir; məhəbbət bəxtəvər olanda necə də gözəldir...

***

Mis doğulan kəs heç vaxt qızıla çevrilməz.

***

Məhəbbət tikan deyil ki, bədəndən çıxarasan, şiş deyil ki, kəsib atasan; o, insanı içəridən məhv edən müalicəolunmaz və inadkar bir xəstəlikdir.

***

Həyatın qiyməti necə də ucuzlaşır və o, necə də bahadır...

***

Məhəbbət bir məxmər örtükdür, bəşəriyyətin naqisliklərini gizlədir.

***

Sevgi nə satın alınır, nə satılır; nə köksünə dirənmiş bıçaqla fəth edilir, nə də gəldiyi zaman ondan qaçmaq mümkün olur.

***
Bir qız gözəl və kasıbdırsa, varlılar və əyanlar ona qarşı ancaq alçaq, günahkar hiss bəsləyə bilərlər. O, hökmən təklif alacaq, amma əsla evlilik təklifi deyil!

***

Gənclikdə nə qədər azğın olsan, qocalıqda bir o qədər riyakar olarsan.

***

Bəxtəvərlik kifayət qədər darıxdırıcı şeydir, insanı tez bezdirir.

***

...Dənizçi həqiqətən də heç bir qadının yanında lövbər sala bilməz. Günlərin bir günü o, dənizə yollanır, pristan boş qalır, başqası gəlib lövbər vurur.

***

Pozğun həyat qadının gözəlliyini sürətlə udur.

***

İnsan elə bir məxluqdur ki, ancaq pulu görür; pulun qoxusunu alan kimi başqa heç nəyi görmür və eşitmir.

***

Heç kim yaxşı və ya pis doğulmur, bizi şikəst edən taleyimizdir ...

***

Bəzən gözüaçıq olanlar da kor olurlar, bu, hər kəsin necə bir qəlbə sahib olmasından asılıdır.

***

Yeknəsəqlikdən bezirsən, hətta bu yeknəsəqlik xoşbəxtlik olsa belə.

***
Həyat gözəl idi, qadınlar — füsunkar, kişilər — mehriban. Bir qədəh içən kimi qadınlar daha gözəl, kişilər isə daha səmimi olurdular.

***

Məsələ xeyirxahlıqda deyil. Nifrətdə də deyil. Mübarizə aparmaq lazımdır.

***

Sağlığında qorxu nə olduğunu bilməyənlər bizim müqəddəslərimizə çevrilirlər. Qorxu bilməyənlərin ürəyində ulduz var.

• 2026-cı il "Emmi" namizədləri bəlli oldu
• Goranboyda İsmayıl Qarayevə həsr olunan “Ədəbiyyat Günləri”
• Devid Bouinin heç yerdə yayımlanmayan mahnıları üzə çıxdı