“Wolt” şirkətində kuryer işləyən 100-dən çox işçi tətil çağırışı edib. Onlar maaş artımı tələbi ilə şirkətin mobil proqramını dondurublar. İşçilərin verdiyi məlumata əsasən, işçi düşməni “Wolt” şirkəti artıq kuryerlərin bir çoxunu işdən çıxarıb.”

Qarşıma belə bir xəbər çıxdı. Düzü, xəbər saytlarında, səhifələrdə bu xəbər qarşıma çıxmamış da məsələdən halı idim. İndiyə qədər bir neçə dəfə kuryerlərin belə cəhdlər etməsindən xəbərim var idi, amma heç vaxt, demək olar ki, müvəffəq ola bilməmişdilər. Bəlkə, indi də şirkət onların tələblərini vecinə almayacaq, işdən çıxarmaqla hədə-qorxu gələcək, lakin vətəndaş institutunun formalaşması, işçilərin etiraz qabiliyyətlərinin nəhayət ki, əmələ gəlməsi naminə təqdirəlayiq addımdır.

“Wolt” şirkətinin kuryerlərə təqdim etdiyi tariflərə əsasən, bir sifariş 1.60 manatdan hesablanır. İndiki halda bu tarif heç bir kuryerə sərf etmir. Çünki az qala, müştəridən çox kuryer var. Şirkət bu qədər kuryeri işə götürəndə nəzərə almalı idi ki, kəmiyyət keyfiyyəti aşağı salacaq.

Onsuz da “iki təkərli tabut”la ömür-gün keçirən, öz canlarını təhlükəyə atan kuryerlərin bu bərbad struktura malik, düz-əməlli velosiped yolları olmayan, küləyindən nəinki motosiklet sürmək, heç piyada yerimək mümkün olmayan şəhərdə işləri düz getmir. Onlar addımbaşı məsuliyyətsiz sürücülərin səhvləri ucbatından qəzaya uğrayır, bəzi ədəbsiz müştərilərin qanacaqsızlığına görə əsəblərini qurban verirlər.

Etibarlı mənbələrdən aldığım xəbərə görə, bəzi şirkətlər “Wolt”la razılaşır, VÖEN-siz filansız, illeqal yollarla işçi yığır və hər ay qazancın 20%-ni özlərinə götürürlər. Vergidən yayınmaq bu qədər asan olduğu üçün 13-14 yaşlı uşaqlar da işləyir.

Bayaq da qeyd etdiyim ki, az qala müştəridən çox kuryer var. Bu qədər az sifarişin və çox kuryerin olduğu dönəmdə tarifləri 1.60 manata endirmək nə qədər doğrudur, əziz “Wolt”? Dayanmadan partnyor kuryerlər qəbul etməyinizin səbəbi nədir bəs? Sizə etiraz edən hansısa kuryerə “onsuz da növbədə gözləyən yüzlərlə adam var” demək üçün edirsiniz bunu? İnsanlara insan kimi yox, statistika kimi yanaşmaq üçün?

Bəli, heç kim heç kimi kuryer işləməyə məcbur etmir, amma bu o demək deyil ki, öz istəyi ilə bu işlə məşğul olan adamın boynuna minmək lazımdır. İşçilərin tələbinə cavab verin. Onları işdən qovmaqla hədələyərək yox, istəklərini yerinə yetirərək. Çünki onlar sizin şirkəti təmsil edirlər, sizin şirkətin çantalarını daşıyırlar, gödəkcələrini geyinirlər. Onlar sizin köləniz deyil, partnyorlarınızdır.

• "Onun evindən bir qılınc, iki tapança çıxmışdı..." - Hüseyn Cavidi, Mikayıl Müşfiqi kim satmışdı?
• "Masumlar apartmanı"nın aktrisası yeni serialda
• İçərişəhərdə “Əbədi Zəfər” adlı tədbir keçirildi