Kulis.az Amil Məmiyevin yeni şeirərini təqdim edir.
***
Yayda yemiş istəyən
- Gənc Tamaşaçılar Teatrı premyeraya hazırlaşır
- Tərcümə Mərkəzinin əməkdaşları “Ain Şəms”də olublar
- Azərbaycan Yazıçılar Birliyinin qurultayının vaxtı dəyişdi
yetim bir körpə üçün
kəsib aydan bir dilim
kimsə göyə qoymuşdu.
Özü də kim idisə
yemiş xoşlayan idi.
Bütün ulduz əvəzi
səma yemiş tumu idi.
***
Dünyanın ən sehrli
fokus nömrəsi idi.
Ağzı boş adamın
ağzından düz söz çıxırdı.
***
"Sənə güldən ağır söz deyərəmmi heç?"
cümləsindəki ağır sözü gülü ağrıdar.
***
Bu sevgi deyilmiş, iki-üç həftəlik
sevgi turuymuş mənə.
Qarşılama, ürəyində yerləşdirmə
və yola salma.
Hamısı da bir məqsəddə, bir paketdə.
Gündə üç dəfə isə içini yemək - hədiyyə.
***
Yox, sığallamırdım, tumarlamırdım.
Dünyanın ən uzun salavatını
çəkirdim saçlarına sənin.
***
Bu insana müvəqqəti olaraq sevgi çatmır.
Sevgi ya sevilməyib yada ki
sevginin əhatə dairəsindədir.
Lütfən bir az sonra yenə sevin...
***
Bir gün ən faydalı qazıntılarla
bəzədiyin bədəninin hissələrini
ən faydasız qazıntı kimi tapacaqlar.
***
Nə qəribə fizioloji yaradılışı var insanın.
Birisi qollarının qatlanacağı yerdən
gücünü göstərərkən
birisi ayaqlarının qatlanacağı yerdən
diz çökür, ilahi.
***
Elə boşam, elə təkəm...
Çağırıb taksi şoferləri kimi
demək istəyirəm.
Gedirsiz, gəlin xanım?
Sevgiyə son bir nəfər,
bircə dənə yer.
***
Nə zalımdı bu dünya, Tanrım.
Kiminsə əlinə düşməmək üçün
kiminsə ayaqlarına düşmək lazım.
***
Hamının adamı var,
heç kimin insanı yoxdu.
Bəlkə də başqasının həyatını
həyata keçirtməkdi həyat.
***
Elə insanlar var ki ürəklərinin dediyini
nəinki dilləri səhv dublyaj edir
hətta sinxron olaraq
dodaqlarıyla belə üst-üstə düşmür.
***
Bir gün qalib edib bir əlini
o biri günsə təslim edib
hər iki əlini qaldırarlar.
***
Deyirlər yumruq
boyda olur ürəklər.
İçdən döyüb adamı,
vurur, vurur, vurur
öldürənə kimi.
***
Yağ ey, ağ qar, çoxlu yağ
topsuz uşaqlara qar topu kimi
adamı olmayanlara qar adamı kimi yağ
***
Bir az yaxşı fikirləş gör özünü hara qoymusan?
Bəlkə itirmisən? Ya yadından çıxıb özün?
Hansı yolla gəlmişdinsə o yolla qayıt,
bəlkə o zaman özünü tapdın.
***
Bəlkə də... anamın yazdığı resept
Dünyanın ən gözəl şeridi elə!
Duz, çörək, düyü, yağ, qənd,
Keşniş, soğan, mer-meyvə...
***
Xaltası boğazından asılı ac it kimi
bağlayıb dənizə kim qoyub gedib
bu qayığı tək-tənha belə?
İşdir açıb buraxsam indi
gedib tutmaz ki balıqları?
***
Süni gülləri evin tozundan
qorumaq üçün təmizləyərsən,
təbii güllərsə evin tozunu
təmizləyib səni qoruyar.
