Dans edək inqilab paltarında - Güneydən şeirlər

Maede Salehinezhad (Aynar Təbrizli), Güney Azərbaycanlı şair

Maede Salehinezhad (Aynar Təbrizli), Güney Azərbaycanlı şair

12 noyabr 2021
# 17:00

Kulis.az “Sözün Güneyi” layihəsindən Güney Azərbaycanlı şair Aynar Təbrizlinin şeirlərini təqdim edir. Əsl adı Maede Salehinezhad olan müəllif 1999-cu ildə Təbriz şəhərində anadan olub və hazırda da Təbrizdə yaradıcılığını davam etdirir.

***

Sapasağlam
Ayaqdayam hələ də...
Qollarıma yaraşan hər qolbağımın
cingiltisidir azadlıq
Qadınam
Qarabağ boyasında,
əsdirin bayrağımı Təbrizin gizli vulkanında...
Qızcığaz etirazlarıma
Ay ulduz çəkim!

***

Əl çəkdim
qadınlıq cizgilərindən
Daşını atdım gizlənpaç sözcüklərin...
Kişisəl sevdim səni
Vətənim kimi
Özgürcəsinə,
Aydıncasına sevdim səni!
Gəl imza ataq
Son qoyaq diktatorluğun
Burma bığlarına...
Gəl bərabər
Terrorlanaq
ana dilimizə
Və dans edək azadlığı
İnqilab paltarında...

***

Göz yaşlarım süzməsin deyə
Yumdum sevgi gözlərimi!
Səni qatıram qəhvəmin dərinliyində
Uduram şəkərsiz sevginin boğumtul dadını!
Boğulur tiroidimdə qırmızı yalanların...
On bir xəbərindən eşitdim,
Cızıqlanıb mənə döndüyün yollar
Hələ də duruşuqlu
Hələ də dikdir əzilmiş qadınlığım!
Elə acıqlı sevirəm ki səni!..


***

Pəncərəm də düşünür
Yelin çırpıntısı
Tam ayrılıqdan deyil!
Hərdənsə yalqızlıqdan üşüyür dörd divarım!
Bəzən bir gediş qorxusundan
Boşalır içki qabları
Sızıltılar...
Ooof... sızıltılar da bütünlükcə sümüklərin deyil...
Kim düşünmüşdü səslərin fəlsəfəsini?
Bəzən sarımtıl yapraqların
əsintisidir pəncərəmdə
Bəzən qısır yolların gediş xəbəridir səslər...
Gah da səssizlikdir
Bütün səslər!
Gecələrin
uğursuzca qızarmış dərisidir pıçıldaşır qulaq taxcamda
Nə yazıq ki,
qucağında bir çimdik də yer yox
Darıxan barmaqlarıma!
Mən,
Gecələrin alnının təri
Süzülmədim heç şüşələrin buğlarından...
Darım-darım dağılmışıq
Həyatın açıqcasında...

Son
qoymuşuq çoxdandır
Bu sonsuz
Həyatın
Üç nöqtəsinə...


***

Sən də bilirsən
Küçə başındakı
bığlı kişilərin
Yuxusundayam
hər gecə!
Bilirsən
Anamın hirsini çıxarır
Dik dabanımın taqqıltısı;
Ayağımda əzilən gilaslar
Utanır dodağımın qırmızılığından!
Ya vəhşicə alnıma dağılan
Buruq saçlarımın dansını görürmüsən havada?
Sən də düşünürmüsən
ilk dəfə
məni necə öpdüyünü?!
istədim deyəm ki,
Düşüncəndən öpürəm!
Sən də yaxşı bilirsən
Geniş deyil
Küçəmizin dünyası!
Bilirsən ki
inqilabımdan qorxurlar
Bütün siyasətçilər!
Bilirsən ki
Bilərziklərimdə səslənir
Şəhərin
romantika etirazları!
Sənsizlikdir qorxum;
Olmasaydı
Nə aclıqdan, nə susuzluqdan qorxardım...
Qəzetlərdə yazardım
Əsarətlərdən
qaçmaq üçün
Öldürüldü
Bu qadın...!

# 660 dəfə oxunub

Oxşar xəbərlər

# # #