Kulis.az “Uşaq sözü” layihəsindən jurnalist, Lent.az saytının baş redaktoru Hafiz Heydərovun 5 yaşlı qızı Məleykə ilə müsahibəni təqdim edir.
– Məleykə, neçə yaşın var?
– 5.
– Gələn il məktəbə gedəcəksən?
– Yox, 10 yaşımda gedəcəm.
– Niyə? Axı 6 yaşında məktəbə gedirlər...
– Yox, 6 yaşında getmirlər. Bacım 10 yaşında getdi.
– Böyüyəndə nə olacaqsan?
– Ana.
– Əlindəki nədi?
– Minnoş.
– Minnoş sənin nəyindir?
– Uşağım. O da böyüyüb ana olacaq.
– Məleykə, ananı çox istəyirsən, yoxsa atanı?
– Ananı çox istəyirəm. Atanı çox istəyirəm. İkisini də çox istəyirəm.
– Səni parka kim aparır?
– Atam. Anam gəlmir.
– Atayla ana dalaşır?
– Həə, dalaşırlar. Amma dalaşan kimi ata gedir qabları yuyur.
– Atan nə işləyir?
– APA işləyir.
– Bəs ana nə işləyir?
– O işləmir. Qab yuyur.
– Axı demişdin qabları ata yuyur.
– Ata ancaq dalaşanda qab yuyur. Dalaşmayanda anam yuyur qabları.
– Ata başqa nə edir evdə?
– Bütün gün kompüterlə oynayır. Sən çox sual verəssən?
– Bir az var. Videoda gördüm ki, armudlara iynə vurursan.
– Mən həkiməm axı. Armudlar da xəstələnmişdi.
– Sağalıblar?
– Hə, amma istidi, yenə xəstələnəcəklər.
– Hardan bilirsən xəstələndiklərini?
– Yeyəndə su axır onlardan. Mən də xəstələnəndə burnum axır.
– Hansı rəngi sevirsən?
– Pəmbə (red. Çəhrayı).
– Bəs hansı heyvanı sevirsən?
– Pişikləri. Amma canavarları yox.
– Canavarları niyə sevmirsən?
– Qorxuram. Adamın üstünə hoppanırlar.
– Tanrı kimdir, bilirsən?
– O nədir?
– Bacı piano çalanda...
(Məleykə sözümü kəsdi)
– Amma indi kəndə gediblər. Üç gün orada qalacaqlar.
– Sən də böyüyəndə piano çalacaqsan?
– Anam deyib get. Bacının on yaşı var, dördüncü məktəbə gedir. Mən amma kəpənəkləri sevirəm...
– Nəyini sevirsən kəpənəklərin?
– Rənglərini. Amma tuta bilmirəm onları. Tutsam ölərlər.
– Ən çox haranı sevirsən?
– Bakıdakı evimizi. Orada iki mərtəbəli kravatımız var. Mən altda yatıram. Çünki bacımın on yaşı var. Dördüncü məktəbə gedir.
– Ən çox hansı yeməyi sevirsən?
– Mannı kaşanı, bir də südlü sıyığı.
– Bəs meyvə?
– Alma, armud, banan, gilənar, mandalin.
– Hansı fəsli sevirsən?
– İsti havalardakını. Hər yer isti olur ha, bax onu.
– Yayı, hə?
– Yox, isti havalardakını.
– Hansı cizgi filmini sevirsən?
– “İsgəndər”i.
– Suallarım xoşuna gəldi?
– Yox. Sənin uşağın var?
– Yoxdur.
– Böyüyüb?
– Yox, hələ uşağım yoxdur.
– Onda sənin atan ölüb?
– Yox, niyə ölsün ki?
– Ölməsin. Atam aşağıda işləyir, biz yuxarıda.
– Sən nə işləyirsən ki?
– Ana oluram da.
