Bu gün İsveç yazıçısı və şairi Dan Andersonun anım günüdür.

Kulis.az onun məşhur "Luossalı diləmçinin ətrafında..." şeirini təqdim edir.

Luossalı dilənçinin ətrafında hamı dairə qurub oturdu,
Tonqal başında dinlədilər onun oxumasını.
Dilənçilərdən, yolkəsənlərdən, heyrətamiz şeylərdən,
Bütün gecə boyu oxudu o, öz ruhunun həsrətini...

Nəsə var dağların o tayında, çiçəklərin, mahnının o tayında,
Nəsə var ulduzlar arxasında, yanan qəlbimin dərinliyində.
Eşitmirsinizmi, kimsə gəlib pıçıldayır, çağırır, yalvarır:
"Gəl bizə, çünki bu yerlər deyil sənin səltənətin!"

Mən sahilə dəyən sakit dalğaların səsini dinləmişəm,
Vəhşi dənizlərin rahatlığından xəyallar qurmuşam əzəldən.
Ruhən tələssəm də o adsız-formasız diyara,
Orada unudulacaq ən əziz bildiyimiz hər bənd.

Vəhşi və əbədi bir həsrətin içinə doğulduq solğun analardan,
Qayğıların doğum sancısından yüksəldi ilk iniltimiz.
Atıldıq dağlara, düzlərə ki, oynayıb dolanaq hər yanda,
Maral, şir, kəpənək, dilənçi və Tanrı olduq biz...

Səssizcə otursam da ürəyi mənimki tək olan o qadının yanında,
O, yumşaq əlləri ilə sevgiylə düzəldəndə yuvanı...
Eşitdim ürəyimin hayqırtısını: "Sənin sahib olduğun sənə məxsus deyil, anla!"
Və ruhum məni aparıb uzaqlara, tərk etdi bu dünyanı.

Sevdiyim şey uzaqdadır və qaranlıq məsafələrdə gizlənib,
Mənim əsl yolum yaşıl, heyrətamiz və təkdir.
Və mən bu hay-küyün ortasında Tanrıya dua etməyə çağırılıram:
"Al bu dünyanı əlimdən, heç kimin sahib olmadığı mənə gərəkdir!"

Mənə qoşul, qardaşım, sakit, sərin çayları olan dağların o tayında,
Orada bütün dəniz asta-asta yuxuya gedər dağ qoynunda.
Göyün o tayında bir yerdədir mənim evim, anam oradadır,
Qızıl naxışlı dumanlar içində, qızılgül mantiyasına bürünmüş halda.

Qoy duzlu sular sərinlətsin atəşdən qızaran yanaqları,
Qoy səhər tam açılmamış mil-mil uzaqda olaq həyatdan.
Bu dünyadan deyildim mən, sonsuz əzab-əziyyət çəkdim,
Narahatlığımda, imansızlığımda, oddan olan sevgimdə batan...

Mirvarilərlə örtülmüş dəniz sahilində qızılgüllərdən bir qapı durur,
Orada, rahatlıq içində çürüyər gəmi qırıntıları, yorğun insanlar dincələr.
Heç vaxt eşidilməmiş uca mahnılar skripka əks-sədası kimi oxuyur,
Səadət övladlarının əbədi gənc yaşadıqları tağlar altında - sevinclə!

Rus dilindən sətri tərcümə: Aydan Ağayeva

• Tanınmış aktrisanın səhhəti pisləşdi
• "Di gəl ki, ürəyimdə ölümün də yeri var..." - Salvatore Kvazimodonun şeirləri
• Tbilisidə Azərbaycan və Gürcüstan rəssamlarının sərgisi təşkil olundu