Kulis.az Tural Əlizadənin "Əlifba" əliflamını təqdim edir.

Haqq aşığı Dədə Ələsgərin pak-mübarək ruhuna ithaf olunur

İlk hərfimiz "A"dır – Allah!
"Be" – Baqidir, daim yaşar.
"Ce" – Cabbardır, məcbur edər,
Həyat qədərlə örtüşər.

"Çe" – Çalab dünyanı qurar,
"De" – Dəyyandır, savab verər.
"E" – eşidər, cavab verər,
Qul muradına yetişər.

"Ə" – Əfüv əfv edər, keçər,
"Fe" – Fəttah qapılar açar.
"Ge" – gözəldir, gövhər saçar,
Şöləsindən göz qamaşar.

"He" – Həlimdir, şəfqətlidir,
"Xe" – Xaliqdir, xilqətlidir.
"İ" – izzətli, taqətlidir;
Sığınan yoxuşlar aşar.

"Je" – jaləylə eşdə gərək,
"Ke" – Kərimdir, xərcdə gərək.
"Qe" – Qəvidir, gücdə gərək;
Əmr etsə, insan daşlaşar.

"Le" – Lətif, görünməz, qaib,
"Me" – Malikdir, mülkə sahib.
"Ne" – nurdan bizə üfləyib,
Odur ki, eşqimiz coşar.

"O" – hər vaxt oyaqdır məgər!
"Ö" – öfkəli, sahibvüqar.
"Pe" – padişah, pərvərdigar;
Saymayan müşkülə düşər.

“Re” – Rəhmandır, rəhmi çoxdur,
"Se" – Səbur, səbirdən toxdur.
"Şe" – Şəriksiz, tayı yoxdur,
Di gəl, azğınlar şirk qoşar.

"Te" – Təvvab; tövbə et barı!
"U" – ucadır görklü tanrı!
"Ü" – ülvidir, həm də arı;
Napaklar yolundan çaşar.

"Ve" – Vəhhab, ehsanı boldur,
"Ye" – Yezdan yavəri-quldur.
"Ze" – Zahirün ələl-külldür,
Əlizadə aciz bir bəşər.

31.07.2020

LÜĞƏTÇƏ

Baqi (ərəbcə) – əbədi

Cabbar (ərəbcə) – məcbur edən

Çalab (əski türkcə) – yaradan, Tanrı

Dəyyan (ərəbcə) – əməllərin qarşılığını verən, mükafatlandıran

Əfüvv (ərəbcə) – əfv edən, bağışlayan

Fəttah (ərəbcə) – xeyir qapılarını açan

Xilqət (ərəbcə) – yaradılış

İzzət (ərəbcə) – güc, qüdrət

Jalə (farsca) – şeh

Eş (türkcə) – bənzər

Kərim (ərəbcə) – səxavətli

Qəvi (ərəbcə) – qüvvətli

Lətif/qaib (ərəbcə) – gözəgörünməz

Malik (ərəbcə) – hökmdar, mülkün sahibi

Məgər (farsca) – yalnız

Öfkəli (türkcə) – qəzəbli

Vüqar (ərəbcə) – əzəmət, ucalıq

Səbur (ərəbcə) – çox səbirli

Şirk (ərəbcə) – şərik

Təvvab (ərəbcə) – tövbələri qəbul edən

Görklü (əski türkcə) – gözəl, görkəmli

Ülvi (ərəbcə) – uca

Arı (əski türkcə) – pak, təmiz

Vəhhab (ərəbcə) – bol nemətlər verən, paylayan, hədiyyə edən

Ehsan (ərəbcə) – yaxşılıq, lütf

Yezdan (farsca) – yaradan, Tanrı

Yavəri-qul (farsca) – qulun yardımçısı

Zahirün ələl-küll (ərəbcə) – hər kəsdən/şeydən üstün, xəbərdar; qalib

Qeyd: Ərəb əlifbası hərflərinin sıralandığı əliflam şeir şəklində yenilik edən müəllif latın qrafikalı əlifbamızın hərflərini sıralamaqla Azərbaycan aşıq poeziyası tarixində latın əliflamının ilk nümunəsini yaradıb.

• "Vətəndaş A"nın səs rejissoru: "Çıxarılan o səhnələrə rejissora etiraz edəcək qədər heyfim gəlir" - Müsahibə
• MEMİM “Mədəni irsini qoru” adlı layihəni təqdim edir
• Tom Kruz 34 ildən sonra eyni rolu oynayacaq