Kulis.az "Met Qala-2026" ilə bağlı materialı təqdim edir.

Dünyanın ən nüfuzlu və eksklüziv moda hadisəsi olan Met Qala 2026-cı ildə də ənənəsinə sadiq qalaraq mayın ilk bazar ertəsi - 4 may gecəsi Nyu-Yorkun Metropolitan İncəsənət Muzeyində möhtəşəm bir pərdə açdı. Lakin bu ilki gecə sadəcə bir qırmızı xalça keçidi deyil, modanın həm keçmişin tozlu rəflərinə, həm də gələcəyin kiber-dünyasına uzanan estetik bir manifesti kimi təqdim edildi.

Hər il xüsusi bir mövzu ətrafında birləşən bu xeyriyyə gecəsi, 2026-cı ili "Costume art" ("Kostyum sənəti") ekspozisiyasına həsr etmişdi. Rəsmi dress-kod olan "Fashion is Art" ("Moda sənətdir") çağırışı dizaynerləri və ulduzları geyimi sadəcə bir örtük deyil, bir heykəl, bir rəsm və ya bir ideoloji obyekt kimi təqdim etməyə təşviq etdi. 2026-cı ilin met Qalasında biz gördük ki, moda artıq funksionallıqdan çıxıb saf sənət müstəvisinə yüksəlmişdir.

Reallıqla virtuallığın mübarizəsi: Keti Perri və süni intellekt mesajı

Gecənin ən çox danışılan məqamlarından biri modanın texnologiyaya verdiyi ironik cavab oldu. Keçmiş illərdə Met Qalaya qatılmadığı halda süni intellekt tərəfindən yaradılan saxta fotoları viral olan Keti Perri, bu il buna sənət dili ilə cavab verdi.

Astronavt stilində, üzü bağlı gələn ulduzun əlcəklərindəki 6-cı barmaq detalı, süni intellektin yaratdığı səhvlərə bir göndərmə idi. O, sanki "mən gerçəyəm, amma moda həm də bir illüziyadır" deyirdi.

Canlanan heykəllər və kinematoqrafik istinadlar

Muzeyin salonları həmin gecə sanki canlanmış sənət əsərləri ilə dolmuşdu.

Heidi Klumun mərmər heykəl görüntüsü, Kili Cennerin Schiaparelli imzalı "çılpaq bədən" effektli heykəltəraşlıq nümunəsi və gələcəyin kiber-zirehlərini xatırladan qiyafələr sənətin müxtəlif dövrlərini birləşdirirdi.

Met Qalada kinonun sehri də unudulmamışdı.

Gənc ulduz Sabrina Karpenter, 1954-cü ilin "Sabrina" filminin orijinal lentlərindən hazırlanmış libası ilə qırmızı xalçaya kinematoqrafik bir nəfəs gətirdi.

79 yaşlı əfsanəvi Çer isə 1974-cü ildəki öz ikonik obrazına müasir bir baxış sərgiləyərək zamanın moda üzərindəki acizliyini nümayiş etdirdi.

Gecənin gözlənilən kraliçası: Rihanna

Rihannasız Met Qalanı təsəvvür etmək qeyri-mümkündür. Rihanna tədbirə Glenn Martens tərəfindən hazırlanmış Maison Margiela Couture libasında qatıldı.

Dizaynerin 2025-ci il payız/qış kolleksiyasından ilhamlanan bu geyim sənətkarlıq nümunəsi idi.

Metalik parça müğənninin ayaqlarını sütunvari bir ətək kimi sarıyaraq yuxarıya doğru yüksəlir və bədəninin üst hissəsini dövrəyə alırdı.

Bu kəsimin mərkəzində isə zinət əşyaları ilə bəzədilmiş parlaq kolyeli boğazlı üst geyimi bütün ehtişamı ilə görünürdü.

Barmaqlarını bəzəyən almaz üzüklər və Cennifer Behr imzalı qırx ədəd metal saç sancağı geyimin forması ilə vəhdət təşkil edərək obraza bədii bir toxunuş qatırdı.

Əlbəttə ki, Rihanna qırmızı xalçada tək deyildi; onu partnyoru A$AP Rocky müşayiət edirdi. Birlikdə onlar gecənin ən dəbli cütlüyünə çevrildilər.

Rocky çəhrayı rəngli, kəmərli, saçaqlı və lələkli çiçək broşu ilə tamamlanan Chanel pencək-paltosunda idi.

Cütlüyün obrazları bir-biri ilə tam koordinasiyalı olmasa da, hər ikisinin fərdi üslubunu mükəmməl təmsil edirdi və hər birinə özünəməxsus şəkildə parıldamaq imkanı verirdi.

On illik həsrətin sonu və viral "mem"lər

Gecənin ən böyük sürprizi, 10 illik fasilədən sonra tədbirə həmsədr kimi qayıdan Beyons oldu.

Onun mirvari və kristal işləməli, insan anatomiyasını incəliklə təsvir edən "skelet" libası sənət və biologiyanın modada vəhdəti idi.

Onun bu möhtəşəm gecəyə qızı Blu Ayvi ilə qatılması, Met Qalanın 18 yaş qaydasının gözəl bir istisnasına çevrildi.

Təbii ki, Met Qala həm də sosial media deməkdir.

Müğənni Sam Smitin dramatik lələkli libası bir anlıq Taylor Sviftin nişanlısı Travis Kelce ilə bənzədilsə də, bu "yanlış anlaşılma" gecənin ən çox paylaşılan zarafatına çevrildi.

Humanizm və inklüzivlik: Modanın yeni sifəti

Bu il Met Qala təkcə dəbdəbə ilə deyil, həm də inklüzivlik addımı ilə tarixə düşdü. İlk dəfə olaraq dörd tərəfli iflic olan model Aariana Rose Philipin bədən ölçülərinə uyğun xüsusi manekenlərin sərgidə yer alması, modanın artıq heç bir sərhəd tanımadığını və hər kəs üçün əlçatan bir sənət növü olduğunu sübut etdi.

Nəticə etibarilə, Met Qala - 2026 bizə xatırlatdı ki, geyindiyimiz hər bir detal əslində, mahiyyətimizi, varlığımızı və tariximizi anladan bir hekayədir.

Moda sadəcə parça deyil, o, fəlsəfədir, tarixdir və ən əsası — sənətdir.

• Erməni ssenaristi Bakıdan qovan Adil İsgəndərov kimdir?
• Sevinc Çılğınla "Poeziya saatı" keçiriləcək
• Kənd havası - Əli Zərbəlinin yeni hekayəsi