Cəfər Cabbarlı adına Respublika Gənclər Kitabxanasında Xocalı faciəsinin 27-ci ildönümünə həsr olunmuş “Unudulmayan faciə, sağalmaz yara” adlı musiqili ədəbi-bədii gecə keçirilib.
Baş İdarədən bildirilib ki, əvvəlcə Azərbaycanın suverenliyi, ərazisinin toxunulmazlığı uğrunda şəhid olanların xatirəsi bir dəqiqəlik sükutla yad edilib.
Tədbiri kitabxananın direktoru Oruc Quliyev açaraq ümummilli lider Heydər Əliyevin “Bütövlükdə Azərbaycan xalqına qarşı yönəldilmiş Xocalı soyqırımı öz ağlasığmaz qəddarlığı və qeyri-insani cəza üsulları ilə bəşər tarixində bir vəhşilik aktıdır. Bu soyqırımı, eyni zamanda, bütün bəşəriyyətə qarşı tarixi bir cinayətdir” sözləri ilə açıb. 176 nömrəli tam orta məktəbin tərbiyə işləri üzrə direktor müavini Palmira Nəbiyeva qanlı faciənin şahidi kimi acı xatirələrini tədbir iştirakçıları ilə bölüşüb.
Tədbirdə çıxış edənlər Xocalı faciəsində silahsız insanların ermənilərə qarşı müqaviməti, verilən qurbanlar haqqında danışıblar. Qeyd edilib ki, Azərbaycan xalqı Xocalı faciəsini heç vaxt unutmur və unutmayacaq.
Sonra Xocalı faciəsini əks etdirən videoçarx nümayiş olunub, 176 nömrəli tam orta məktəbin şagirdləri “Xocalı harayı” kompozisiyası və “Layla, Xocalım layla”, “Xocalı yası”, “Xocalı, ay Xocalı”, “Ay bəlalı Xocalım”, “Xocalı” şerləri ilə çıxış ediblər./azertag.com
