Kulis.az Ilqar Kamilin “Ən qısa hekayə” müsabiqəsinə göndərdiyi “Ana” (449 işarə) hekayəsini təqdim edir.
"Dööz!" - son eşitdiyi söz bu oldu...işıqlar söndü, zülmət çökdü, hər yer sükuta qərq oldu...
Bir xeyli belə keçdi. Yavaş-yavaş uzaqdan bir səs gəlməyə başladı:
- Oğlum, Murad, qalx!
Səs getdikcə yaxınlaşırdı:
- Vaxtdı, oyan artıq, ana qurban!
Səs elə hüzurlu idi ki...
Xumarlana-xumarlana gözlərini açdı. İlahi, bu ki, anası idi. Bütün vücudunu heyrət bürüdü. Dirsəklənib, təəccüb içində dilləndi:
- Gözlərimə inanmıram, anacan, sən həyatdasan?!
Ana həzin səslə cavab verdi:
- Yox, əziz balam, sadəcə sən həyatda deyilsən!...
