Həsən Kür
Qar havası
Bayırda qar havası
Ucsuz-bucaqsız dəniz
Çıraqsız neft yatağı
Sahildəki balaca
Səslənir ləpələrə:
"Eşidirsən atacan?"
Bayırda qar havası
Köhnə qocalar evi
Pəncərədə bir ana
Hey ah çəkir dərindən
Qız isti yuvasında
Oğul iş səfərində
Bayırda qar havası
Yataqxana üstündə
Üzü üstə çevrilən
Boş əlil arabası
İntihar məktubuna
Üç-dörd söz yazılıbdır
"Başına çöksün görüm
o icra xarabası"
Bayırda qar havası
Səkinin kənarında
Dilənən mamaroza
İsinməyi vəd edir
Bu hava da iyrəncdir
Bu sarsaq vədlər kimi
Bomjlar bürünüblər
Hisli-paslı adyala
Eynilə yay gecəsi
İşıq dirəklərini
Öpüb bağrına basan
Ağcaqanadlar kimi
İntihar Məktubu
Sən bunu oxuyanda
Yəqin ki, çox gec olar
Bir ağacın qolunda
Asılmış vəziyyətdə
Ruhum göyə ucalar
Dəyişərəm dünyamı
Yarı qorxaq yarı mərd
Bəlkə də eşidəndə
Bir az kədərlənərsən
Dolarsan, olarsan pərt
Camaat əzab ilə
Daşıyacaq leşimi
Söndürə bilməyəcək
Anamın göz yaşları
Cəhənnəm atəşini
Atam bir az qocalar
Alnına qırış düşər
Bir müddət lal oturar
Çinardan qisas alar
Kökünə balta vurar
Kim hardan biləcək ki
Mənə intihar fikrin
Əslində sən ötürdün
Sallandığım çinarın
Dibini sən bellədin
Suyunu da sən verdin
Bəlkə də... lap əksinə
Ölməyim haqda sənə
Çatmayacaq səs-səmir
Lənətə gəlmiş poçt da
Doğru-düzgün işləmir
İnsan itkisi
Gözlərim yolunda qalıbdır yenə
Gələndə yadımdan çıxıb gətirmək
Çünki ağlımı da itirmişəm mən
Axı asan deyil insan itirmək
Bu səhər yuxudan çox tez oyandım
Ümidlə götürdüm telefonu mən
Yazdım ki, sabahın xeyir əzizim
Görüş yerimizə gələ bilərsən?
Çox keçdi, amma ki, cavab gəlmədi
Hər keçən saniyə çəkirdim zülüm
Sənə nə olubdur? xəstələnmisən?
Axı bu vaxtadək yatmazdın gülüm
Ya da ki, telefon sönülü olub
Mesaj yazdığımı bilməmisən sən
Bu səhər mən elə davranırdım ki
Sanki yaşayırsan ölməmisən sən
Qalxıb çay dəmlədim tələm-tələsik
Qonaq otağında süfrə düzəltdim
Aldım bəyəndiyin şirniyyatlardan
Hər şeyi ayrı bir həvəslə etdim
Gül satan qadının güldürdüm üzün
Aldım əlində ki, tər çiçəkləri
Əynimi dəyişdim, üzümü qırxdım
Qovdum divardakı hörümçəkləri
Ancaq ki, heç yerin tozun silmədim
Çünki, saxlayıram əllərindən iz
Nə olar, yanında yer sal mənimçün
Yəqin ki, tezliklə ölərəm sənsiz
