Kulis.az 8 Mart Beynəlxalq Qadınlar günü münasibəti ilə Azərbaycanın müasir qadın şairlərinin şeirlərini təqdim edir.

Mirvarid Dilbazi

Gəl

Qırıq açar qapı açmaz,

Qırıq qanadla quş uçmaz.

İgid olan darda qaçmaz,

Gəl, çətinə dözənim, gəl!

Tərlan idin, dönmə sara.

Qonmaq üçün zirvə ara.

Aman vermə gülü xara,

Gəl, dünyanı gəzənim, gəl!

Dağam, duman var başımda,

Ürək alışar döşümdə.

Gəl, ağlatma bu yaşımda,

Ürəyimi əzənim, gəl!

Girdim hicran otağına,

Dözdüm illər sınağına.

Gəl, ey solğun yanağıma

Mirvarilər düzənim, gəl!

Mədinə Gülgün

Bir ovuc qar

Həkim çox qulaq asdı,

Ürəyimi yoxladı.

Həssas barmaqlarını

Nəbzim üstə saxladı.

Qəlbinin döyüntüsü

Artmış bir qədər, dedi.

İçsən bu dərmanları

Yəqin düzələr, dedi.

Söylədim, aman, həkim,

Əbəsdir dərman, həkim.

Qulaq as ürəyimin

Tellərini dindirən

Həsrətə, qəmə, həkim.

İçsən bu dərmanları

Sağaldar demə, həkim!

Vətəni darda qalan,

Gözü yollarda qalan

Bir elin xəstəsiyəm,

Nüsxə yazma nahaqdan.

Mənə bir çiçək gətir

Doğulduğum torpaqdan.

Boynu bükük bənövşə,

Bağrı yanıq lalə dər,

Məni dərmanlar deyil,

O çiçəklər dirildər.

Savalanın qarından

Bircə ovuc tap, həkim.

Bu vaxtsız ayrılıqdan

Çəkməyim əzab, həkim.

Qoyum sinəmin üstə,

Yanğım azalsın barı.

Sanım ki, vətəndəyəm,

Unudum ağrıları,

Unudum ağrıları...

Nigar Rəfibəyli

Durna

Mən

yuxuda durna oluram

gecələr,

Çırpıb qanadlarımı

yerdən üzülürəm.

Geniş-geniş havalarda səf çəkən

Durnaların qatarında düzülürəm.

Uçuruq uça bildikcə,

Uçuruq diyar-diyar...

Uçuruq - qəlbimizdə

Torpaqdan aldığımız

Ən şirin,

Ən incə,

Ən sevimli arzular.

Uçuruq uça bildikcə...

Bizə həsrət qalan ellərə

Qanad salırıq,

Uca-uca dağların başında

Əylənib qonaq qalırıq.

Torpağın ətrini aparırıq

Ulduzların aləminə.

Həyat səsi qatırıq

Göydə soyuq-soyuq işıqlanan

ayın yalqızlıq qəminə.

Səhər

şəfəqlər oyadır məni.

Sevinə-sevinə durub

Qalxıram ayağa:

Sonra bütün günü

Nə həvəsim olur,

Nə macalım,

Bir də yerdən üzülüb

durna olmağa.

Esmira Məhiqızı

***

ağlıma gəldi ki, mən mən deyiləm,

mən orda qalmışam, oralar məndə.

ömür də bölünüb ağa, qaraya,

ağlar uzaqlarda, qaralar məndə.

heç mənlik deyilmiş bu yol, bu yöntəm,

hər karvan dalınca ulayan itəm,

bir az da qürbətəm, bir az da vətən,

haralar varıymış... haralar məndə.

dərdə diz basmaqdan, dizlərim yara,

izimə düşürəm, izlərim yara,

ayağım, ürəyim, gözlərim yara,

yeriyir, yüyürür yaralar məndə.

Səhər Əhməd

***

Bir az da yaxın oturun,

Lap həyatın yanında.

Yeni bir payız başlayır,

Pəncərələr önündə.

Səhərlər təndir çörəyi

və yağışlı havalar.

Səngiyirmi küçənizin

tinindəki davalar?!

Cavan-cahıl tərk edirmi

Yığışdığı dalanı,

Seyrəlirmi gəlişləri

Qatıqsatan xalanın?!

Yenə alov qüllələri

Gecə parıldayırmı,

Dərin bir yuxu içində

Yağış şırıldayırmı?!

Yandırdızmı sobaları,

Çəkdizmi pərdələri,

Asdınızmı divarlardan

Ömrün "xəritələrin"?!

Bir az da yaxın oturun,

Lap həyatın yanında.

Yeni bir payız başlayır,

Pəncərələr önündə.

Həyat Şəmi

Adını sən qoy

Ozan çalsın havamızı,

adını sən qoy...

Uçurduğun yuvamızın

adını sən qoy...

Hər gün bir az darıxmağın,

durub özümdən çıxmağın,

gözdən ürəyə axmağın

adını sən qoy.

Baxır hey arxanca gözüm,

gözümdə mirvari düzüm,

doğulmayan körpəmizin

adını sən qoy.

Bu qədərmiş... bitdi oyun,

boğazımda sevgim düyün...

ürəyinə öz sevdiyin

qadını sən qoy.

adını sən qoy: ...

Rəbiqə

***

Allah, mənə bir az bəxt ver,

bir az da vaxt, yaşayım.

Bir az ömrümdən yaşayım,

Bir az sərvaxt yaşayım.

Mənə gecələr yuxu,

Səhərlər gümrahlıq ver.

Mənə bir damcı qorxu,

Bir damcı toxtaqlıq ver.

Bir az ümiddən yolla,

Bir az işıq at, bəsdi.

Bir az ağıl ver, seçim

Nə bəsdi, nə əbəsdi.

Bir az mərhəmət göndər,

Bir də, bol-bol məhəbbət.

Bircə sənə yazmağa

Bir yerim olsun xəlvət.

Bir tikə çörək tapım,

Bir parç su, yaşayaram.

Bir də, qızımı qoru,

Nə versən, daşıyaram.

Sevinc Elsevər

Sevgidə kompleksli qadın

Sevimlim Yıldız Tilbəyə ithaf...

bükülüb otururam

kağıza soxuluram

qoca görünürəm

donqarlaşır belim

bilirəm...

ağladımsa

üzümdə artır qırışlar

bir az da böyüyür burnum

yekəlir ağzım

ötən yaz üst damağımdan çəkdirdiyim dişin

boş yeri görünür

güləndə gizlədə bilirəm halbuki

ordakı qara dəliyi

ağlayanda yadıma düşmür.

küsdümsə,

əyilir üzüm

çatılır qaşım

yığılır alnım

dodaqlarım büzülür

yaraşmır mənə küsmək...

hirslənsəm,

göyərir üzüm

xırıldayır səsim

qışqırsam, dilim görsənir nəyi var

dilimi göstərməkdən utanaram oysa həmişə...

yatanda necə göründüyümü

bilmək istədim

gözümü yumdum

şəklimi çəkdim

baxdım xeyli azalıb gözəlliyim

ağzım açıq qalır yatarkən

uşaqlığımdakı kimi...

indi yanında ölməyim gəlsə,

necə görünəcəyimi dərd edəcəm

əvvəlcə...

Könül Arif

Əkiz çapıq

Çapıqlarımı

İsanın yaşında –

Otuz üç yaşımda

Sevməyə başladım.

Eyni səmtdə – sol tərəfdə

Sənin də çənəndə

Birini görəndə

Çaşıb-qaldım.

Sonra gizlicə

Həmin kafedə

“Şair çapıqsız olmaz” deyə

Sən qulağıma pıçıldadın.

O vaxtdan bəri,

qeyri-ixtiyari,

Gördüyüm insanların üzündə

Çapıqlar axtarmağa başladım –

Biz ayrılandan bəri

Çapıq-çapıq olub

Gözlərimin iziylə

Bu küləklər şəhəri.

Necə də mənasızmış səbəbləri

Bütün estetik əməliyyatların.

Fəridə Uğur

***

Müharibədə ata-anasını itirmiş uşaqlar

günəşə baxıb gülümsəyəcəklər bir gün

bütün mərmilərə inad...

Əri çıxıb getmiş o qadın da

yığacaq gözünü yollardan

gətirib güzgülərdəki boşluqlara atacaq...

Bilirəm, çıxacaq divardakı bu fotodan

darıxan qağayılar haçansa

dənizə tərəf uçacaqlar...

Onda evim olacaq mənim də və

mətbəxdən başlayacam unutmağa səni

ən əvvəl yağı unudacam ocaqda

sonra dəmi...

bu otağa nəyə gəlməyimi...

Ya da çörək almamış qalxacam evə...

Nə qədər ki, atamı ayaq səslərindən,

Anamı nəfəsindən tanıyıram – hələ vaxt var

İncit məni bir az daha

Noolar, bircə tez unudulma...

Aysel Əlizadə

Sən

Sən elə gəldin

elə bil bütün gedənlər sənsən.

Hamının yerinə peşman gəldin.

Bir də Sən

Məni də

hardansa tapıb gətirdin.

Belə gəldin

başqa cür...

Günel Şamilqızı

Məlikməmmədə

Sən mənim quyuma xoş gəldin, oğlan,

Məni saçlarımdan asıb bu nağıl.

Alma axtarırdı sənə verməyə,

Bir quyu dibində azıb bu nağıl.

Bir div saçlarıma toxunan gündən

Uzanıb, uzanır bu edam, oğlan.

Mən bu div oğlanla tükəndim, bitdim,

Sənə külüm qaldı, ay adam oğlan.

Düşmən Məlikməmməd, dost Məlikməmməd,

Çıxart bu quyudan “sonra”larımı.

Sənin barmağında duz qalıb, oğlan,

Göynədir mənim də yaralarımı.

Alnımda yazılar yaman gündədir,

Bu qara sözləri kim ağardacaq?

Bütün quyuların dərini mənəm,

Məni öz içimdən kim çıxardacaq?

Bu nə pis yuxudur, ayılmaq çətin,

Hər gün diri olmur sağ görünənlər.

Nə olar, qoçların rənginə baxma,

Həmişə ağ olmur ağ görünənlər.

Bu yerin üstündə o qədər dərd var,

Quyu dərdlərimin izi itərmiş.

Bir simurq lələyi yandırıb yetiş,

Sənin qardaşların divdən betərmiş.

Sən mənim quyuma xoş gəldin, oğlan,

Məni saçlarımdan asıb bu nağıl.

Alma axtarırdı sənə verməyə,

Bir quyu dibində azıb bu nağıl.

• Azərbaycan Dövlət Tərcümə Mərkəzi ləğv olundu
• Türkan Hüseynin iki filmi post-prodakşn mərhələsindədir
• "Gəncədən Bakıya" layihəsi Emin Sabitoğluna həsr olunub