"Müəllim kimi məvacib yüksək olsa, xanəndə toylara gedəndə daha seçici olar. Toy əgər əziyyətlidirsə, özünü oraya hədər etməyə dəyməz".

Kulis.az xəbər verir ki, bu sözləri Əməkdar artist Babək Niftəliyev Lent.az-a müsahibəsində deyib.

O, toyların peşəkar musiqiyə təsirindən danışıb:

"Toyda başdan-ayağa muğam oxumuruq ki. Şən musiqilər oxuyuruq, qonaqları rəqsə dəvət edirik. İndi bəy-gəlinin toya daxil olması ilə bağlı yeni bir şey üzərində işləyirəm. "İncə bellim"lə bəy-gəlini zala daxil edirəm. Bu, bizim musiqimizdir. Bunu ilk dəfə Gülyaz, Gülyanaq bacılarında gördüm. Bu yenilikdir. Əsas odur ki, yad bir musiqi səslənmir. Toylarda yad musiqinin əleyhinəyəm.İndi efirlərdə yeni bir söz çıxarıblar: "toy böyük məktəbdir". Əvvəl çadır toylarında xanəndələr olurdu. Bir-biri ilə bəhs edib daha yaxşı oxuyurdular. Bakı toylarında muğam oxuyurdun, bir də baxırdın kimsə yaxınlaşıb qulağına deyir ki, filan qəzəli düz oxumadın. Bakı kəndlərindən dünyalar qədər razıyam. Mən Bakı kəndlərində püxtələşmişəm".

Əməkdar artist efirlərdə senzuranın tətbiqinin zəruri olduğunu qeyd edib:

"Son dönəmlər efirlərimizə bəzi qadağalar qoyuldu. Bəzi dırnaqarası ifaçılar sıradan çıxdılar. Mənşəyi bilinməyən mahnılar oxuyurdular. Küçədə olan sözləri işlədirdilər. Artıq təmizlənib və bu, davam edir. Əvvəl senzura var idi. Müğənninin geyiminə və oxuduğu mahnılara uyğunluğuna baxılırdı. Senzuralar mütləq olmalıdır. Əvvəllər səsi olanlar gəlirdilər sənətə. İndi nə qədər adam pula görə gəlir. Elə bilirlər, gəlib yanımda bir az hazırlaşıb gedib toylardan pul qazanacaqlar".

• "Qınadığım şeylərə qarşı məndə maraq oyatmağa haqqınız yoxdur..." - Floberin "Hisslərin tərbiyəsi" romanından sitatlar
• Siçovul dərisi geyinmisən, dalana dirənib gözlərin - Cavid Fərzəli
• Mətləb Muxtarovun filmi beynəlxalq mükafata layiq görüldü