Elə həyat var ki, kədərli, keşməkeşli keçib. Həyat da var daha çox xoşbəxt anları ilə yadda qalıb. Fərqli, təkrarsız, bir-birinə bənzəməyən həyatlar var...

Yazarlarımız öz həyatlarını bir cümləyə sığışdıra bilərmi?

Kulis.Az bu barədə sorğu keçirib. Cavabları təqdim edirik.

Afaq Məsud

İştirak etmədiyim yuxu.

Anar

78 il həyatımı bir cümlə ilə ifadə edə bilmərəm.

Vaqif Nəsib

Ala-babat.

Çingiz Hüseynov

Həyatıma aid beşmərtəbəli bir cümlə: (1) İlahinin mənə bəxş etdiyi (2) böyük həqiqətləri yazmağa qadir olan (3) Qələmin (4) ağası deyil (5) qulu olmaq.

Saday Budaqlı

Bir cümləylə ifadə etmək olsaydı, o zaman yaşamazdıq ki?

Səfər Alışarlı

Bacardığım, gücüm çatan heç bir işdən yan keçməmişəm, bəzən özüm də bilmədən gəncliyimi böyük riskli mübarizələrə vermişəm, kimsədən qiymət gözləməmişəm, təşəkkür ummamışam, indi hərdən özümlə məşğul olmağa çalışıram.

Seyran Səxavət

70 illik həyatım bir cümləyə sığmadığı üçün cavab verə bilmirəm.

Mehriban Vəzir

Dalğaların üzərində, təlatümdə keçən bir ömür.

Aqşin Yenisey

Biri var idi, biri yox idi.

Qan Turalı

Mən xoşbəxt olmaq istəyirdim...

Cəlil Cavanşir

Getməyə yer, vida etməyə adam, sıxmağa əl yoxdursa üzülmə, güzgüdəki əksinə göz vur, yanağını çimdiklə və davam...

Aqşin Evrən

Futbol topunu sevib, portağala məhkum olub, Yer kürəsinin dalınca qaçan və ofsaydda - oyundan kənar vəziyyətdə olan "yupyumru bir eşq".

Rəbiqə Nazimqızı

Həyatım mənim üçün payız havasıyla yaz ətrinin qarışığından ibarətdir, uğurlarımı da, uğursuzluqlarımı da sevirəm.

Könül Arif

Sükutda bir atəş qorxusu var!

Kənan Hacı

Bu ömür alınmadı.

• Acım acıdır, şirinim xoş gəlməz daha - Şaiq Vəli
• Əlisa Nicatın oğlu mənə nə dedi?
• Məşhur aktrisa vəfat etdi