Kulis.Az Aynur Qəniyevanın şeirlərini təqdim edir.

***

Saatları dəqiqələrə, günlərə illərə

Həyatları, ömürləri qocalığa vuranda

Nə etsən də cavab yenə zaman edir.

Deyirlər ki hər şeyi zaman edir

Ömrü indi, bu an ölməyəcəyinə söz vermir

Həyat bütün ümidləri köhnəldir

Zaman günü, ayı ili, insanı yerə vurub yerlə bir edir

Yaşam an-an, il-il, gün-gün zaman-zaman

Ömründən yığışır, köçür, gedir

***

Baxışın isidir soyuq şəhəri

Sənin varlığındır doğmalaşdıran

Bu başdan-ayağa yamyad yerləri

Bu donuq simalı boz küçələri.

İsidə bilirsən bir gülüşünlə..

***

Səssiz gecə kimi zülmət cildində

Əzablar qoynunda zillət içində

Tənhalıqla birgə yalqız təklikdə

Özüm tənhalığı bayram edirəm

Badə qaldırıram tənhalığıma

Bir az “həzz alıram” bir az “gülürəm”

Həm “xoşbəxt” oluram həm “sevinirəm”

Hisslərim ağlayır boş ürəyimdə

Duyğum didikləyir fikirlərimi

Ruhum göz yaşını qonaq göndərir

İndicə sildiyim nəm gözlərimə.

***

Zülmətləri geymiş lüt gecələrdə

Sevişir yad və doğma yataqlarda

Bütün qanuni və qanunsuz sevişənlər

Ayrı-ayrı şəhərlərdə, ayrı-ayrı evlərdə

Bəlkə də qonşu küçələrdə qaranlıq otaqlarda

Yaddan daha yad olan buz kimi qucaqlarda

Gecənin özü qədər çox darıxır

Yatmaq üçün uzanan, biri-birini sevən iki insan

***

Ömrümdən sonraya bilet gəzirəm

Axtarıram o naməlum ünvanı,

O bileti alacağım o müəmmalı adamı

Gəlsin tapsın məni, versin biletimi

Gedib görüm həyatımdan sonranı

• Luvr yenidən ziyarətçilər üçün bağlandı
• Ədalət Əbdülsəmədin 60 illik yubileyi qeyd olundu
• Berlin Film Festivalında yeni qərar: Bu ildən sonra...