Alatoran Yayınlarından daha bir kitab - yeni dövr rus ədəbiyyatının ən görkəmli simalarından biri olan Sergey Dovlatovun “Çamadan” romanı çapdan çıxıb.

Kitabı Vasif Qarayev tərcümə edib.

S. Dovlatov (1941-1990) Rusiyanın Ufa şəhərində doğulub, atası teatr rejissoru, anası ədəbi korrektor olub. 1959-cu ildə Leninqrad universitetinin fin filologiyası fakültəsinə qəbul olunub, dərslərə davamiyyəti pozduğuna görə universitetdən qovulub. İosif Brodski ilə dostluq edib. Daha sonra 3 illik hərbi xidmətini həbsxanaların mühafizəsi sistemində başa vurub. İosif Brodskinin xatırlamasına görə “Dovlatov əsgərlikdən dönəndə elə bil Tolstoy Krımdan bir bağlama hekayəylə qayıtmışdı və baxışlarında bir sarsıntı vardı”. Yenidən universitetə daxil olur, jurnalistikayla məşğul olur, hekayələr yazır. Uzun müddət ədəbi jurnallar onun əsərlərini qəbul etmirlər. Bir müddət Estoniyada yaşayır, təkrar Leninqrada qayıdır. Dissident baxışlarına görə dövlət orqanları tərəfindən təqib edilir, “samizdat” nəşrlərdə və emiqrant jurnallarda əsərləri yayınlanır. Nəhayət təzyiqlərə dözməyərək mühacirətə üz tutur, Nyu-York şəhərində yaşamağa başlayır.

Burada rus dilində çıxan “Yeni amerikalı” qəzetinin baş redaktoru kimi çalışır. Qəzet tezliklə rus mühacirləri arasında böyük populyarlıq qazanır. Bir-birinin ardınca nəsr kitabları işıq üzü görməyə başlayır. 1980-ci illərin ortalarında onun əsərlərinə böyük oxucu tələbi yaranır, ən prestijli jurnallarda dərc olunur. 12 illik mühacirlik dönəmində 12 kitab yazır. SSRİ-dəsə yazıçını yalnız samizdat nəşrlərə görə tanıyırdılar. Sergey Dovlatov 24 avqust 1990-cı ildə, Nyu-Yorkda ürək çatışmazlığından vəfat edir.

Sergey Dovlatov əsəri Azərbaycan dilində ilk dəfə yayınlanır.

Oxuzalı.az

• Cümhuriyyətin ilk xarici işlər naziri - Onu kimlər intihara məcbur etmişdi?
• İnsanın doğulması – Maksim Qorkinin hekayəsi
• “Molla Nəsrəddin” jurnalının 120 illiyinə həsr olunmuş sərgilər açıldı