Kulis.az "Hekayə müzakirəsi" layihəsində Həmid Piriyevin "Qarışqanın ruzisi" hekayəsi haqqında yazıçıların fikirlərini təqdim edir.

Şərif Ağayar: "Albert Eynşteyn deyirdi, bir mətləbi sadə ifadə edə bilmirsənsə, demək, yaxşı anlamamısan. Əlbəttə, mətn mütləq sadə olmalıdır deyə bir qayda yoxdur, mürəkkəb üslub və texnikalar da var, lakin mən subyektiv bir oxucu kimi ciddi məqamların sadə ifadəsinə daha çox heyran qalıram. Buna öz aləmimdə iri bir gəminin yükünü qayıqla gətirməyə bənzədirəm. Məncə, Həmid Piriyev də sadə və səmimi bir mətnlə istədiyinə nail olub. Orda bir detal vardı, xüsusilə bəyəndim: qapı cırıldayanda kişi onu yağlamaq lazım olduğunu düşünür. İlk baxışdan süjetə dəxli olmayan detaldır, lakin nəinki dəxli var, hətta hekayənin bir çox vacib xüsusiyyətlərini təyin edir və ona canlılıq gətirir. Bu, əsl yazıçılara xas spesifik ustalıqdır. Təbrik edirəm müəllifi".

İlham Əziz: "Həmid o biri mətnlərində olduğu kimi bu hekayədə də atmosfer yarada bilib. Sadə, gündəlik həyatın ədəbiyyata çevrilmə prosesi çox qəribədi. Elə məsələləri bir-birinə calamalısan ki, hadisə önə çıxmasın, yerdə xas akvamarin qalsın.

Nəsrdən bu gün vizuallıq tələb olunur. Bu hekayəni oxuyanda hər şey gözündə canlanır. Bəzi mətnləri oxuyanda adama elə gəlir ki, cərəyan edən hadisələrə uzaqdan, qonşu hasardan boylanırsan. Həmidin hekayələrində adam özünü mətləbin və hadisənin düz ortasında tapır, bu da ustalığa bariz işarədi. Mətləbi ən minimal işarələrlə bizə çatdırıb, artıq heç nə yoxdur. Bir sözlə, Həmid hekayələrinə oxşayır".

Sevinc Elsevər: "Həmidin həssas qəlbi var. Sadə, amma dərin hisslərlə qələmə alıb hekayəsini. Xoşuma gəldi. Sonluqdakı cümlə də şeir misraları kimidir".

Orxan Cuvarlı: "Qarışqanın ruzisi" nüvəsində keçmiş təəssüfü dayanan, insanın gecikməsi, peşmanlığı üzərində qurulmuş hekayədir. Bu hekayəni müəllifin əvvəlki mətnlərinin davamı kimi gördüm. Həmidin mətnlərində həyatın gündəlik axarından, iddiasız fraqmentlər olur. Təhkiyəsi üzdə görünsə də, mətləbi dərinlərdə gizlənir. Onun dramaturgiya kölgəsində gizləndiyini görməmişəm. Həmişə bəzək-düzəksiz təhkiyəylə çatdırmaq istədiyini çatdırır. O, mənim maraqla oxuduğum, yeni mətnlərini həvəslə gözlədiyim yazıçıdır..."

• Bəlkə, düşüm gözündən, ölüm əllərin üstə... - Gülər Natiq İsaqın şeirləri
• Qəlb ağıldan üstündür... - Günün mahnısı
• Amnistiya aktı Ağadadaş Ağayevə də şamil olundu