Hara baxır axı bu polislər? – Amildən yeni minimalist şeirlər

Hara baxır axı bu polislər? – Amildən yeni minimalist şeirlər
19 aprel 2021
# 15:12

Kulis.az Amil Amalın yeni minimalist şeirlərini təqdim edr.

Cənab Mersoya

Hakim düşünürdü...
Sol əlin günahı nə idi?

Qatil
sağ əli ilə
atəş açmışdı,
qərarı beyin vermişdi
varlığın günahı nə idi?

***

Əlimi kitaba
ayağımı aya basıb
and içərəm ki,
bir yaradan var,
mütləq var.

***

Uzun müddətdir
qucaqlanmayan,
sığal dəyməyən qadın
selfi edirdi bulvarda.

Fonda kaktus ağacları…

***

Güllə
anasının qurban dediyi
qoyunun qanını
alnına yaxacağı yerdən
dəymişdi.

***

Sentyabr...
Zenit raket
təmas xəttində
göylərə tuşlanmışdı,
günəş ekvator xəttində
zenitdə olarkən.

***

Kim ki quldur,
məhz o olur
sonra
quldur.

***

Bəlkə də
yemək yemədikləri üçün
ağappaq olur
afrikalı uşaqların dişləri.

***

İçimdəki hisslər
ocağın hisi kimi
gözümü yaşardır.

Hiss edirəm
üstümdən yox,
içimdən
his iyi gəlir.

***

Qar yağmır,
qar yağmır,
göydə tanrıların
yastıq davası gedir.

***

Bəlkə də tütün
gül növüdür deyə
adətən
stolun üstündə
yanaşı dayanır
külqabı ilə gülqabı.

***
İsmayıllı…
Çalxalayır nənəm
taxta nehrəsini,
səma ulduzlarla dolu
kəhkəşanlı
parlaq
süd yolu.

***

Bir yumruqluq canıyla
hər an döşünə döyüb
səsin başına atıb
sanki demək istəyir
əsas ürəkdir

***

Kənddə
hər yerdə
işıq söndü
bircə,
ay yanırdı
göydə.

***

Hara baxır axı
bu polislər?
Bu boyda
partlayan ürək
gəzdirirəm üstümdə.

***

Bəlkə də tanrı
əsəblərini sakitləşdirmək üçün
yaratmışdı
okeanları,
dənizləri,
içindəki balıqları.

***

Dərdlərimdən aptek açdım,
əczaçısın tapammadım.

Dedim olsun,
özüm satım.
Alıcısın da tapammadım.

Özüm aldım.

***

Səhərlər küçələri,
axşamlar öz evini
süpürən qadın.

Beli bükük,
biləkləri güclü,
saçları
süpürgə qadın.

Axı necə olur
dünya hələ də
çirkab içində.

# 2255 dəfə oxunub

Oxşar xəbərlər

Nəriman Nərimanov Tağıyevin pul yardımından niyə imtina etmişdi?

Nəriman Nərimanov Tağıyevin pul yardımından niyə imtina etmişdi?

09:00 23 iyul 2024
Mikayıl Mirzənin oğlu:  "Atam sağ olsaydı, mən səfir idim..." - Müsahibə

Mikayıl Mirzənin oğlu: "Atam sağ olsaydı, mən səfir idim..." - Müsahibə

09:00 22 iyul 2024
Molla Pənah Vaqif haqqında deyilənlər, yazılanlar və gerçəklər

Molla Pənah Vaqif haqqında deyilənlər, yazılanlar və gerçəklər

11:57 21 iyul 2024
Qustav Floberin novellası - dilimizdə ilk dəfə

Qustav Floberin novellası - dilimizdə ilk dəfə

09:00 19 iyul 2024
Müəllif "qızları ərə verməyə tələsməyin"  demək istəyir? - Hekayə müzakirəsi

Müəllif "qızları ərə verməyə tələsməyin" demək istəyir? - Hekayə müzakirəsi

09:00 16 iyul 2024
Qonaqlıq - Günün lətifəsi

Qonaqlıq - Günün lətifəsi

09:00 13 iyul 2024
#
#
# # #