Kulis.az Məhəmməd Nurinin tərcüməsində Sara Mohəmmədi Ərdəhalinin şeirlərini təqdim edir.

Çağdaş fars şairi Sara Məhəmmədi Ərdəhali 4 yanvar 1976-cı ildə Tehranda anadan olub.

İxtisasca sosioloqdur. “Musiqiyə aşiq olan ağ tülkü”, “Daşlar üçün”, “Biganə gülür” və “Qızılgül qapını döydü” adlı şeir kitabları işıq üzü görüb.

MORUQLU DONUT

Bir qadın vardı,
bütün kafelərdə
moruqlu donut sifariş edərdi.

Bilməzdi
payızın nə olduğunu,
nəticəsiz eşqin nə olduğunu.

Bir qadın ki,
daim aşiq olardı
və həmişə düşünərdi ki,
birinci dəfədir
moruqlu donut sifariş edib.

ÇAP OLUNMAMIŞ ŞEİR

Əlimi
oxuya bilmirlər.
Sənin çap olunmamış şeirindir
mənim əllərim.

XƏSTƏLİK

Qoca qarı olaram.
Alzeymer taparam.
Zəng vuraram.
Oğlumsanmış kimi
“Sənin üçün
o qədər
darıxmışam!”
deyərəm.

QIZILGÜL

Qızılgül qapını döydü.
Məni öpmək istəyirdi.
Gec idi.

Gec, mən və qızılgül
bir-birimizə
yaraşırdıq.

SAKİTƏM

Sakitəm
gecə paltarlarının kətan krujevaları kimi,
tərk edilmiş salondakı
tutqun abajur kimi.

Sakitəm
qış geyimləriylə dolu çamadan kimi,
min dəfə maşında yuyulub,
ipdə qurudulub,
masaya sərilən süfrə kimi.

Sakitəm,
rəngli karandaşların ağ karandaşı kimi.
Sakitəm
və göz yaşlarım vecimə deyil.

OYAQLIQ

Qoca şahmat fiquruyam.
Vəzifəm
hərəkətsiz qalmaqdır.

ÇAY

Mənim evimdə
şəbəkə tutmur.
Evimə yaxın
bir çay var,
orada da
şəbəkə tutmur.

İstəyirəm
kimsə çayın kənarında
dalbadal
nömrəmi yığsın
və dalbadal
eşitsin:
“Bu nömrəyə zəng çatmır”.

RƏNGLƏMƏK

Nənəmin köhnə masasını rəngləyirəm.
Fırça yavaş-yavaş yuxarı-aşağı gedir.
Tünd qəhvəyilər
yaşıl olur,
yamyaşıl...
Sanki heç vaxt
tünd qəhvəyi olmayıblar...

Gözəl gündür.
Ordibehiştə bir ay qalıb.
Hansı il istəyir, qoy olsun.

TƏNHALIQ

Tənhayam
və sənsiz
tənhalığın mənası yoxdur.

SİZƏ MİNNƏTDARAM

Sizə minnətdaram.
Yaşıllaşdırdınız əllərimi.
Heç vaxt
heç kim
məni bu qədər ciddiyə almamışdı.
Siz o cümə günortası, o parkda
ağacdır deyib
oyuna qatdınız məni.

Ah, əziz sərçələr!
Görəsən bir də
qonacaqsınızmı çiynimə?

MƏN VƏ SƏN

Biçarə ətirşah!
Bu günlər naxoşam,
onun da iki-üç yarpağı quruyub.

Nə etmək olar?
Su qabımız birdir.

VƏSİYYƏT

Qəbir daşım yüngül olsun.
Həbs etməyin məni qısa bir məsafəyə.
Doğum və ölüm tariximi boş buraxın.
Adımı da.

Ora ancaq bir cümlə həkk edin
bir qeyd kimi
küləyin əl-ayağı altda:
“Gedirəm çay dəmləyim”.

• "Hüzn nə deyirsə desin, həyat gözəldir..." - Braziliyalı yazıçıdan sitatlar
• Flora Kərimova Mehriban Əliyevaya təşəkkür etdi
• Məşhur rəssam vəfat etdi