Bakıda rəssam Rəfail Əlizadənin fərdi yaradıcılıq sərgisi keçirilib.

Kulis.az xəbər verir ki, sərgi Azərbaycan Respublikası Mədəniyyət Nazirliyi və Azərbaycan Rəssamlar İttifaqının təşkilatçılığı ilə V.Səmədova adına sərgi salonunda təşkil olunub.

Sərgidə Rəfail Əlizadənin rəngkarlıq və qrafika əsərləri, eləcə də teatr, kino və televiziya sahələrindəki yaradıcılıq nümunələri təqdim edilib.
Tədbirdə rəssamın 80 illik yubileyi də qeyd olunub. Azərbaycan Rəssamlar İttifaqının sədri Fərhad Xəlilov Rəfail Əlizadəni yubileyi və fərdi sərgisinin açılışı münasibətilə təbrik edib.

Təbrikdə bildirilib ki, Rəfail Əlizadə 40 ildən artıq müddətdə Azərbaycan Televiziyası və Radiosunda quruluşçu və tərtibatçı rəssam kimi fəaliyyət göstərib. O, bu illər ərzində çoxsaylı televiziya tamaşalarına bədii tərtibat verib, orijinal geyim eskizləri hazırlayıb və ölkənin təsviri sənətinin inkişafına töhfələr verib.

Qeyd olunub ki, rəssamın rəngkarlıq və qrafika əsərləri respublikada və xaricdə təşkil olunan sərgilərdə dəfələrlə nümayiş etdirilib, diplom və mükafatlara layiq görülüb. Onun yaradıcılığında milli və ümumbəşəri sənət ənənələri, yüksək sənətkarlıq və estetik məziyyətlər öz əksini tapıb.
Fərhad Xəlilov rəssama cansağlığı, uzun ömür, tükənməz ilham və bədii yaradıcılıq fəaliyyətində yeni uğurlar arzulayıb.
Tədbir sənətsevərlərə rəssamın yaradıcılığı ilə yaxından tanış olmaq, onun sənət dünyasını və müxtəlif istiqamətlərdə ərsəyə gətirdiyi əsərləri görmək imkanı yaradıb.

Rəfail Əlizadə çıxış edərək bildirib ki, sərgiyə təqdim edilən 80-dək sənət əsərində təbiət mənzərələri, vətənpərvərlik, humanizm və xeyirxahlıq kimi mövzular əks olunub. Onların arasında xüsusilə Qarabağa aid - “Ruhumuz buradadır”, “Ana dağı”, “Qarabağ xalçası”, “Qarabağ atları”, “Şəhid şəhər”, “Zəfər şahidi”, tele tamaşalardan isə “Günahsız Abdulla”, “Mürafiq vəkilləri”, “Ürəkdə baş-başa” rəsm əsərləri sərgi iştirakçılarının marağına səbəb olub.

Uzun illərin zəhmətinin məhsulu olan sənət əsərlərindən ibarət sərgidə rəssamın sənət dostları, ailə üzvləri iştirak ediblər.
Qeyd edək ki, Rəfail Əlizadə 1986-cı ildən Azərbaycan Rəssamlar İttifaqının üzvüdür. 2016-cı ildə rəssamın 70 illik yubileyinə həsr olunmuş fərdi sərgisi də V.Səmədova adına Sərgi salonunda təşkil edilib və geniş ictimaiyyət tərəfindən maraqla qarşılanıb.

• Qara keşişdən Kürmükə: "Sonuncu alban" necə öldü? - ŞƏRH
• Peşəkar rəssamların etüd əsərləri Xətai Sənət Mərkəzində
• Maykl Ceksonun "Super Bowl" şousu haqqında sənədli film çəkiləcək