“KVN Parni-iz Baku” teatrının rəhbəri, aktyor Tahir İmanov bü günlərdə Şuşada olub, babası, bəstəkar Süleyman Ələsgərovu evini, həyətini ziyaərtə edib. Kulis.az aktyorla əlaqə saxlayıb təəssüratlarını öyrəndi.

“Mən axırıncı dəfə Şuşada 1988-ci ildə olmuşdum. Şuşada öz uşaqlığıma qayıtdım. Doğma, əziz, atam, anam, babam, nənəm, bir sözlə hər şeyim olan Şuşama qayıtmışam. Biz həyatımızın yarısını Bakıda, yarısını isə Şuşada keçirmişik. Bu bizim evimizdə bir adət, ənənə şəklində olub. Tətillərimiz, boş vaxtlarımız olan kimi Şuşaya gedirdik. Qoy heç kim məndən inciməsin, amma biz heç vaxt başqa şəhərlərə istirahətə getməmişik. O vaxtı Pribaltikaya, Moskvanın bağlarına, Soçinin sanatoriyalarına istirahətə getmək dəbdə idi. Süleyman Ələsgərov və onun ailəsi heç vaxt elə yerlərdə qalmayıb. O, həmişə özünün boş vaxtlarını Şuşada keçirib, ailəsini də ora aparıb. Ona görə düşünürəm ki, bizim başqa variantımız da yoxdur. Hesab edirəm ki, dövlət Şuşa ilə bağlı bizə nə iş tapşırsa, biz onu canla-başla yerinə yetirə bilərik.”

T.İmanov daha sonra əlavə edib:

“Mən də, qardaşım Cabir də həmişə deyirdik ki, indi bizi Şuşaya aparsanız, oranın hər yerini gözübağlı taparıq. Ora gedəndə yanımızda olan hərbçilər məəttəl qalmışdılar ki, biz otuz ildən sonra bunları necə yadımızda saxlaya bilmişik. Biz Şuşaya gedəndə, təsadüfən belə alındı ki, avtobus düz nənəmgilin məhləsində saxladı. Mən nənəmgilin məhləsini, babamın evini, “Kor qala” məhləsini öpəndə sanki nənəmi, babamı, dayımı öpürdüm. Şuşada, İsa bulağında o qaya, daş, torpaq qalmadı ki, mən onu öpməyim. Başqa cür necə ola bilərdi ki? Axı bu mənim uşaqlığımdı. Mən hər qayaya canlı kimi yanaşırdım. Bunu sözlə ifadə etmək çox çətindir. Məni ancaq şuşalılar, əsli-kökü Şuşadan olanlar başa düşə bilərlər.”

Aktyor daha sonra arzu-istəklərini dilə gətirdi.

“İnanıram ki, dövlətim Süleyman Ələsgərovun xatirəsini əbədiləşdirmək üçün müəyyən işlər görəcək. Orada tək Süleyman Ələsgərovun yox, həm də Üzeyir Hacıbəyovun, Xan Şuşinskinin, Bülbülün, Əşrəf Abbasovun və bir çox sənətkarlarımızın evi var. Düşünürəm ki, onların evlərini bərpa etdirmək bir prinsip məsələsidir. Bu istiqamətdə dövlətimiz çox gözəl işlər görəcək. Mən buna əminəm.”

• “Məhsəti” beynəlxalq festivalda
• Hamamda boğulub ölən qiraətçi kimdir? - Bakıda faciə
• “Üzeyir Hacıbəyli və musiqi mirası” adlı konsert tədbiri keçirildi