Bu gün Dövlət Qulluqçularının Peşə Bayramı Günüdür.
Kulis.az bu münasibətlə Daşqın Məmmədovun təbrik yazısını təqdim edir.
Əksər peşələrdən olduğu kimi dövlət qulluqçularından da ədəbiyyatda qələmini sınayanlar olur. Dövlət qulluğunda olmaq yazıçıya həm də mövzular verə bilir. Hərçənd mən bundan cəmi iki hekayəmdə istifadə etmişəm. Amma bu özü də az deyil və artmaq şansı var.
Rəsmi işdə çalışmaq yazıçının mətnlərinin təhkiyəsinə bəzən təsir edir. Rəsmi yazışmalar adətən quru və konkret olduğundan bu, az ya çox dərəcədə mətnlərdə özünü göstərə bilir. Bundan yayınmaq üçün əziyyət çəkməli oluruq.
İşin gərginliyi və çoxluğu ədəbi məhsuldarlığa mənfi təsir etsə də, yazıb-oxumağa daim vaxt tapmaq olur. Yazmaq və oxumaq özü də bir istirahətdir. İş masamda daim bədii kitab da olur. Hazırda Gülnar Əhmədin “Türkiyədə danışır Bakı” romanını bitirmək üzrəyəm. Bu arada Gülnar xanım bu romanı çox gözəl yazıb.
Şabran rayonunun çox fəal ədəbi mühiti var. Xəqani adına Poeziya evi fəaliyyət göstərir. Poeziya evində tez-tez kitab təqdimatları, yaradıcılıq görüşləri keçirilir. Bu sahədə poeziya evinin rəhbəri, şairə Aybəniz Əlyarın böyük rolu var. Mərkəzi kitabxanada da vaxtaşırı maraqlı görüşlər təşkil edilir.
Hekayələrimin paylaşılmasında, oxucuya çatdırılmasında ən böyük pay kulis.az saytının payına düşüb. İlk dəfə bu saytda dərc olunmuşam və yazılarıma həmişə diqqət göstərilib. Əksər hekayələrimi paylaşdığınıza görə xüsusi təşəkkür edirəm.
Mətanət xanım Vahid tərəfindən yaradılmış “LitArtAz” ədəbi agentlik mənim üçün tam göydəndüşmə oldu. Yeni bitirdiyim romanın redaktə, korrektə və nəşr işini agentlik üzərinə götürdü. Bu da məni xeyli əlavə işdən azad etmiş oldu. Hansı ki, həmin işlərdə heç bir təcrübəm də yox idi. Artıq bütün işlər yekunlaşıb, kitabın sentyabr ayınadək nəşr edilməsi nəzərdə tutulub. Məni naşı olduğum xeyli işdən xilas etdiyinə görə buradan Mətanət xanıma da təşəkkürümü çatdırıram. Agentlik mənim kimi iş rejimi gərgin olan bir çox ədəbiyyat adamının işinə yaraya bilər.
Yazmaqdan başqa ədəbi mühitdə də fəallığım var. Bu yaxınlarda yazıçı, redaktor Hədiyyə Şəfaqət xanımın təşəbbüsü ilə yaradılmış Müasir Azərbaycan Kitabı klubunun kitab müzakirələrində fəal iştrak edirəm. Məqsədimiz müasir Azərbaycan yazıçılarını təbliğ etmək, onların daha çox oxunmasına nail olmaqdır. Yaxın vaxtlarda bu müzakirələri internet üzərindən daha da genişləndirməyi planlaşdırırıq.
Dövlət qulluğunda olmağım yazılarımda azadlığımı heç vaxt məhdudlaşdırmayıb, mənə elə gələ də bilər. İşinin məsuliyyətini hiss etmək istər-istəməz təhtəlşüurumuza təsir edir. Amma yaradıcılıqla məşğul olan insan cəsarətli olmasa, uğur qazana bilməz.
Kulis.az saytının verdiyi imkandan istifadə edib dövlət qulluqçusu olan həmkarlarımı təbrik edirəm.
