Kulis.az yola saldığımız ildə vəfat edən tanınmış mədəniyyət adamlarının siyahısını təqdim edir.
Xalq artisti Arif Quliyev bu ilin mayında koronavirus infeksiyasına yoluxub. Aktyor müalicə alsa da, mayın 7-də xəstəxanada dünyasını dəyişib.
Azərbaycan Yazıçılar Birliyinin birinci katibi, Xalq şairi Fikrət Qoca da bu ilin mayında vəfat edib.
Xalq şairi Musa Yaqub vəfat edib. Şair 84 yaşında dünyasını dəyişib. Musa Yaqub parkinson xəstəliyindən əziyyət çəkirdi.
Yazıçı Azər Abdulla kəskin pnevmoniyadan dünyasını dəyişib.
Xalq artisti Canəli Əkbərov bu ilin oktyabrında 81 yaşında dünyasını dəyişib. Xanəndə II Fəxri Xiyabanda dəfn edilib.
Xalq artisti Rafiq Hüseynov (Rəmiş) aprelin 5-də vəfat edib. Gitara ifaçısının səhhəti ağırlaşmış, xəstəxanaya yerləşdirilmişdi. Onun ağ ciyərlərində problem olsa da, xəstəxana koronavirusdan vəfat etdiyini açıqlayıb.
Müğənni Aslan Hüseynov avtomobil qəzasında dünyasını dəyişib. Sənətçi Gəncədən gələrkən sükan arxasında yatıb və qarşıdakı maşına çırpılıb.
Müğənni Səyyad Əlizadə sentyabrın 30-da vəfat edib. Sənətçinin ölümünə səbəb koronavirus infeksiyası olub.
Xalq artisti Ramiz Əzizbəyli də bu ilin yayında koronavirusa yoluxub. Aktyor yerləşdirildiyi xəstəxanada iyunun 9-da dünyasını dəyişib.
Əməkdar artist Zöhrə Abdullayeva da 2021-ci ildə itirdiyimiz sənətkarlardan olub. O, mayın 28-də dünyasını dəyişib.
Xalq rəssamı Tahir Salahov mayda Almaniyada müalicə olunduğu xəstəxanada dünyasını dəyişib.
Xalq artisti Səməd Səmədov iyulun 24-də dünyasını dəyişib. Onun ölümünə səbəb koronavirus infeksiyası olub.
Xalq artisti, tanınmış kinorejissor və ssenarist Eldar Quliyev bu ilin aprelində dünyasını dəyişib.
2021-ci il yanvarın 4-də bəstəkar Nailə Mirməmmədli dünyasını dəyişib. O, infarkt keçirmişdi.
Yanvarda vəfat edən digər bir sənət adamı isə Azərbaycan Dövlət Akademik Opera və Balet Teatrının keçmiş solisti, Əməkdar artist İsmayıl Ələkbərov olub. O, koronavirus infeksiyasından dünyasını dəyişib.
Əməkdar artist Əlican Əzizov fevralda vəfat edib.
Xalq artisti Yalçın Rzazadə 74 yaşında vəfat edib. O, uzun sürən xəstəlikdən sonra fevralda dünyasını dəyişib.
Xalq artisti Ramiz Məmmədov vəfat edib. Onun ölümünə səbəb xərçəng olub.
Əməkdar artist Baloğlan Əşrəfov vəfat edib. Koronavirusa yoluxan müğənni apreldə evində dünyasını dəyişib.
Rusiya və Azərbaycanın Əməkdar artisti Mutay Xadulayev 2021-ci ildə dünyasını dəyişib.
Xalq artisti, “Qaya” estrada-simfonik orkestrinin yaradıcısı və bədii rəhbəri Teymur Mirzəyev sentyabrda vəfat edib. O, 85 yaşında ömrünün son illərini yaşadığı İsraildə dünyasını dəyişib.
Əməkdar artist Məcnun Hacıbəyov vəfat edib. 86 yaşında dünyasını dəyişən aktyorun ölümünə koronavirus infeksiyası səbəb olub.
Azərbaycanın Əməkdar artisti, Prezident təqaüdçüsü Firudin Ələkbərov 100 yaşında vəfat edib. Onun ölümünə səbəb ürək çatışmazlığı olub.
Xalq artisti, rejissor, professor Ağakişi Kazımov dünyasını dəyişib. O, bu ilin oktyabrında 85 yaşında vəfat edib.
Bu ilin sentyabrında Əməkdar artist Yaqub Zurufçu da vəfat edib. Müğənninin ölümünə səbəb koronovirus infeksiyası olub.
Xalq artisti Vaqif Əliyev 81 yaşında vəfat edib. Bildirilib ki, o, ürək çatışmazlığından dünyasını dəyişib.
Xalq artisti Rafiq Əliyev 70 yaşında dünyasını dəyişib. O, xərçəng xəstəliyindən əziyyət çəkirdi.
Əməkdar mədəniyyət işçisi, “İRS” folklor ansamblının rəhbəri Sidqi Mustafayev vəfat edib. 73 yaşlı musiqiçinin ölümünə səbəb koronavirus infeksiyası olub. Onun eyni zamanda 2 qızı, həyat yoldaşı və qudası da Covid-19-un qurbanı olub.
