Azərbaycan Kinematoqrafçılar İttifaqı Hökumət Evindən çıxarılır

Azərbaycan Kinematoqrafçılar İttifaqı Hökumət Evindən çıxarılır
23 yanvar 2013
# 18:36

Rüstəm İbrahimbəyovun rəhbərlik etdiyi Azərbaycan Kinematoqrafçılar İttifaqı (AKİ) uzun illərdir fəaliyyət göstərdiyi Hökumət Evindən çıxarılır.



Bununla bağlı APA-ya açıqlamasında AKİ-nin katibi Əli İsa Cabbarov deyib. Onun sözlərinə görə, hazırda 40-a yaxın fəhlə ittifaqa məxsus əmlakını otaqlardan çıxarmaqla məşğuldur: “Əmlakımız üçün xüsusi anbar ayrılıb. Amma bu məkanı boşaltmaqla bağlı bizə heç bir sənəd göstərilməyib. Bu gün məsələ ilə bağlı Bakı şəhər İcra Hakimiyyətinin nümayəndəsi gəldi. Bildirdi ki, biz binadan çıxmalıyıq. Biz sənəd tələb etdik. Bildirdilər ki, sənədi sabah göstərəcəklər. Hazırda Rüstəm İbrahimbəyov ölkədə deyil, amma məsələ ilə bağlı onu məlumatlandırmışıq. Bizə göstəriş olub ki, hökumət orqanları ilə konfliktə girmək olmaz, deyirlər çıxın, biz də çıxırıq”.

Əli İsa Cabbarov deyib ki, binadan çıxmaqla bağlı heç bir əsas göstərilməyib: “Bunun vergi problemi ilə aidiyyəti yoxdur. Sadəcə çıxarılmamız Bakı Şəhər İcra Hakimiyyəti tərəfindən həll olunur. Artıq ittifaqımız yersiz qalır və yer tapana kimi harada fəaliyyət göstərəcəyimizi bilmirik. Amma bu o demək deyil ki, ittifaqın fəaliyyəti dayanır. Biz fəaliyyət göstərəcəyik”.

İttifaq katibi deyib ki, hazırda qurumun yerləşdiyi otaqların təhvil alınması prosesi aktlaşdırılır.

# 1401 dəfə oxunub

Müəllifin son yazıları

# # #