Kulis.Az Fariq Rəcəblinin “Ən qısa hekayə” müsabiqəsinə göndərdiyi “Niyə qar?” (500 işarə) hekayəsini təqdim edir
Bütün gözəl hekayət, bütün gözəl nağıllar kimi buna da yaradanın adıyla başlayıram-la başlayan sevimli filmini çoxuncu dəfə izləyirdi.
Fərz etdiyimiz yaşdadı, bildiyimiz ölkədə yaşayır və həmin şəhərin ən faydalı vətəndaşlarındandı. Özünün dediyinə görə, həyatına 10-cu kənddən başlayıb, çünki ilk 9 kənddən qovulacağını bilirmiş, vaxt itirmək istəməyib. Ağlı tez-tez qaçır deyirmişlər, bunu problem eləyib çarə axtarıb tapıb.
Əsl problemsə bir gün ağlını itirməməkçün onu çıxarıb atandan sonra başlayıb. O gün bu gündü, bu palçıq rəngli insan qarın niyə yağdığını anlaya bilmir.
