Kulis.Az Fuad Babayevin “Ən qısa hekayə” müsabiqəsinə göndərdiyi “İşsiz” (481 işarə) hekayəsini təqdim edir.
- Sən Allah, qoy oturmuşuq, - qardaşı üzünə xeyli baxandan sonra qeyzlənib – Necə yəni Moskvaya gedirəm? Nə var Moskvada? Hansı pulla gedirsən Moskvaya? - birnəfəsə yağdırdı. Sonra dinmədiyini görüb:
- Aqil, səninlə deyiləm? Cavab ver, - dedi.
- Nə deyim?
- Nə deyim? Mən soruşuram ki, bu hardan çıxdı? Bilirsən neçəyədir ora bilet?
- Bilirəm.
- Nəyi bilirsən?
- Biletin qiymətini.
- Pulun var?
- Var, - ürəksiz dedi, - olacaq.
- Aqil, nə olub birdən-birə?
- Heç nə olmayıb?
- Olub? – qardaşı çaşqın-çaşqın soruşdu – Nə olub?
- O olub ki, 2 ildir ki, Çelyabinskdə iş tapa bilmirəm.
