Kulis.az şairə Sevinc El Sevər yeni, “Yarımçıq şeirlər”ini təqdim edir.
gecənin bir aləmi
uşaq ağlayıb alma istəyir
elə təəccüblənir ana
elə bil
bilmir almanın nə olduğunu...
***
sevmir üzüklü əlini
sabuna batırmağı
barmağında deyil
cibində gəzdirir
qırxillik nişan üzüyünü
kafedə qabyuyan qadın
azacıq boş zaman buldumu
bir köşəyə çəkilir
cibindən çıxarıb baxır
can yoldaşı çoxdan
torpağın altında
***
ayaqqabısı su keçirir
amma sevir yağışı
atasına babasından qalma evin
dam örtüyü islanır
seçilmir
qonşuda sevdiyi qızın atasının
keçən yaz tikdirdiyi
ikiqatlı evin dam örtüyündən
***
hansı marketdə oyuncaq satılır
yan keçir
yanındakı uşaqla
girməkdən qorxur
"çörək satılan yerdə
oyuncağın işi nə?"-deyinir ürəyində
yolu uzanmış ya...
***
avtobusda bir kişinin başı üstündə
ayaq üstə dayanan qadın:
"qarnım hələ balacadı
ondan bilmədi bəlkə
hamilə olduğumu..."
başı üstündə ayaq üstə qadın dayanan kişi:
"iki dayanacaq o yanda
düşəcəm
görəcək oturacağın altından
qoltuqağacı çıxardığımı..."
***
qırılmış bir qanadını
yanında gəzdirən quş sayaq
gəzdirir
qoltuğunda portfelini
içində satılmayan kitabları
harda bir dostuna rast gəlir
portfeli qoltuğundan çıxarıb yerə qoyur
əyilib içindən bir kitab alır
qanadlanır...
***
stolun başında oturmamışdan da
dadına baxmışdı
qənddandakı qəndlərin
milçəklər
indi hansına birinin qonduğunu görsə
götürüb kənara atır
"sofu adam"
***
vərəm xəstəsi Cəfər
demir anasına xəstə olduğunu
səhərlər balıncındakı qan ləkəsini
bilmir necə gizləsin
gah üzünü çərtir lezvayla
gah barmaqlarını
anasını azdırır
göstərib yaralarını
siqaret çəkən deyildi
siqaret çəkir
fabrikə işə tələsir
"öskürdür səni
çəkmə o zəhrimarı"- sözlərinə gülümsəyir
qutudan çıxardığı siqaretlərin
arxasını üç dəfə qutuya döyməklə
ölüm hökmünü kəsir...
***
səhərlər çayına
şəkəri az salmağından
qol düymələrini və
ayaqqabılarını cütləməməyindən bilir
arvadının narazı olduğunu...
***
hər axşam divanın altına
atdığın corablarını
çarpayının başına asdığın
şalvarının ağını
stulun kürəyinə saldığın
köynəyinin yaxalığını
kirlidi
kirli deyil deyə
hər səhər iyləyən qadını
anan qədər əziz tut...
***
bir anlıq fikrə gedərək
unutdu ütünü əlində ütülədiyi köynəyin sinəsində
ütünün açdığı deşiyi görüb
elə qışqırdı ki
sanki
güllə deşik açmışdı
ərinin ürəyinin başında...
***
anası öldü
yığışdırdı ortadan
anasıyla baş-başa çəkdirdiyi şəkilləri
ölümlə bu qədər yaxın dayanmaqdan üşəndi...
***
bəzən qışın ortasında da
qadının eynək taxmağı
yaşmalanmağıdı
baxışlarını gizləməkdi amacı
naməhrəm gözlərdən
gözlərdən qəlbə yol var...
***
tələyə düşən siçanla
cizgi filmindəki pişikdən də
amansız davranan
atasına
dördgözlə
ağzıayrıq baxan uşaq
ağzından çənəsinə
çənəsindən sinəsinə axan
bir damcı sudan diksinir...
***
keçən ilki çantasına
ağır gəlir
bu ilki kitabları
təkərli çanta arzusundadı balaca
müəllimə də gedib-gəlib
təpinir uşaqların arasında
"əymə belini, düz otur" deyə...
***
gözü hamilə qadınlar axtarır hər yerdə
qarınlarındakı bəbələrin
çəkisini
uzunluğunu ölçür gözəyarı
müqayisə edir öz qarnıyla
üzündəki ləkələri
üzlərindəki ləkələrlə
əl barmaqlarındakı şişləri
onlardakı şişlərlə
ən çox da
yanındakı kişini
onların yanındakı kişilərlə
kiminki daha qayğıkeş
kiminki diqqətli
kiminki çox sevir deyə...
