Kulis.az gənc şair Kamran Bağırlının şeirlərini təqdim edir.

Quranım ana

Həyatda ümidim, arxa, dayağım,
Böyük həyatımı quranım ana.
Bu dünya adınla bağlıdır sənin,
Qibləm səcdagahım, "Quran"ım ana.

Cənnət ətrindən özünə güc al,
Dərin xəyalınla yenə nəzər sal,
Uzun ömür yaşa, hər an belə qal
Gözümün önündə duranım ana.

Zirvəsən, özünlə çox yaşa öyün,
Məbədi olmusa həm yerin, göyün,
Səsin nəfəsimdi, eləcə döyün
Ürək tək canımda vuranım ana.

Zəfərin mübarək, azad Qarabağ

Qəlbimdən qoynuna yollar salmışam
Azadlıq eşqinlə zəfər çalmışam.
Necə də xoş xəbər səndən almışam
Zəfərin mübarək, azad Qarabağ.

Düşmənlər uduzub, haqsızlar qaçıb,
Böyük ormanlarda tər güllər açıb.
Kəlbəcər elinə günəş nur saçıb,
Zəfərin mübarək, azad Qarabağ.

Qubadlı, Zəngilan, Şuşa dağları
Nəğmədir, şeirdir yaşıl bağları.
Qalıbdı geridə yetim çağları,
Zəfərin mübarək, azad Qarabağ.

Xocavənd, Cəbrayıl bizdən alınmaz
Ayrılıq nəğməsi daha çalınmaz.
Yadların məkanı orda salınmaz
Zəfərin mübarək, azad Qarabağ.

Ağdərə, Ağdamın qırılmaz bəndi
Şanlı bir tarixdi, şəhəri, kəndi
Bizimdi Füzuli, canım Xankəndi
Zəfərin mübarək, azad Qarabağ.

Ay şəhid oğullar, sizə qurban can,
Laçın, Xocalıda axmaz daha qan,
Şirin körpə kimi dil açır hər yan,
Zəfərin mübarək, azad Qarabağ.

Ay mənin dilimin bal məhəbbəti

Xəbərdar eylədim doğmanı, yadı,
Könlümdə, dilimdə var bircə adı,
Heç vaxt itirmərəm bu şirin dadı,
Ay mənim dilimin bal məhəbbəti.

Canına verməyə can qatılıbdı,
Qanımdan qanına qan qatılıbdı,
Arıdan nə gözəl şan qatılıbdı,
Ay mənim dilimin bal məhəbbəti.

Qoxun çox şirindi, edir məni şən,
Gözumdə çiçəkdən alınmısan sən,
Səni yad əllərə vermərəm ki mən,
Ay mənim dilimin bal məhəbbəti.

Qəlbimdən gedibdi, qəmim qalıb az,
Öldürər həsrətin etsən mənə naz,
Adını çəkəndə xatırlanır yaz,
Ay mənim dilimin bal məhəbbəti.

• Məktub yetişmədi - Abdulla Şaiqin hekayəsi
• "Uşağın ciyərini kəsib götürdük..." - Çöpçülük ilahi vergidir, yoxsa fırıldaq?
• Şahbaz Xuduoğlu: "Türk Mədəniyyəti və İrsi Fondunu məhkəməyə verəcəyik"