“Hekayədən sonra” layihəsində Cavanşir Yusifli, Şərif Ağayar, Kənan Hacı və Mirmehdi Ağaoğlu Mübariz Örənin “Qar Tanrısı” hekayəsini müzakirə ediblər.

Mübariz Örənin müzakirəyə münasibətini təqdim edirik:

“Onu deyim ki, "Kulis.az" internet dərgisi öz "qazanında qaynatdığı" proseslə və bu yöndəki dinamikliyi ilə ədəbi mühitdə baş verməkdə olan proseslərdə daima ön sırada olub. "Hekayədən sonra" layihəsi də bu sarıdan uğurludur. Belə başa düşdüm, elə layihənin adından da görünür ki, müzakirənin ruhunda bir "atüstülük" var; yəni təqdim olunan hekayəni oxuduqdan sonra yaranan hissləri, ilk təəssüratı, formalaşan rəyi "isti-isti" bölüşmək. Məncə, bu əla formatdı. "Qar Tanrısı" hekayəmin bu müzakirəyə cəlb olunması, orada hekayə haqda fikir, münasibət bildirən ustaların yanaşması çox maraqlı idi. Öz yazım haqda "yalandan ah çəkmir" (C. Yusifli), "dilin tam yeni çalarlarından istifadə edir "(K. Hacı), "...qəhrəmanından fərqli olaraq zirvədən... əlidolu qayıdır, belə gözəl hekayə ilə" (M. Ağaoğlu), "Hekayənin mövzusu M. Örənin özünün yaradıcılıq konsepsiyasına uyğundur: əsas olan nəticə deyil, prosesin özüdür"(Ş. Ağayar) kimi fikirləri maraqla oxudum. Şərif Ağayarın mətnə "... müasir tematika, bir az sosial lad, bir az postmodern fəndlər..." qatmaq təklifi də maraqlıdır. Hər halda digər hekayələrimdə, məsələn "Şpaqat vəziyyəti", "Oğru", "Ot"... hekayələrində müasir tematika da, sosial lad da yox deyildir və öz "qabığımın" imkan verdiyi "ərazilərdə" yeni cəhdlər də olacaq”.

• Ledi Qaqa "Wednesday" serialının ikinci mövsümündə rol alacaq
• Yay tətilini necə keçirdim - Əli Zərbəlinin hekayəsi
• Emir Kusturitsa Putin haqqında film çəkmək istəyini dilə gətirdi