Kulis.Az bu gün AYB-dən istefa verən görkəmli yazıçı Çingiz Hüseynovla yazılı müsahibəni təqdim edir.

- Maraqlıdır ki, istefa müraciətini niyə indi etdiniz? 2004-cü ildən bəri nə dəyişdi?

- Səbəb – hamımıza xas olan tənbəllik.

- Belə düşünənlər var ki, müraciətiniz bir az subyektivdir, yəni istefa səbəbləriniz kimi yalnız öz yaradıcılığınıza və şəxsinizə olan soyuq münasibəti göstərmisiz. Halbuki, məsələn, artıq neçə qurultaydır ki, indiki sədrə real bir alternativ yoxdur.

- Belə düşünənlər də haqlıdırlar... Demokratik prinsiplər ölkədə necə - AYB- də da eləcə.

- Fikrət Qoca sizinlə bağlı məsələyə açıqlama verərkən deyib ki, AYB-nin Moskva bürosu onu tapa bilməyib. Sizi tapmaq belə çətin idi?

- (Gülüş)

- AYB-də sonuncu dəfə nə vaxt olmusunuz?

- Yüz il öncə - bəlkə də çox.

- Xalq yazıçısı Mövlud Süleymanlı deyir ki, Çingiz Hüseynovun getməsi ilə AYB heç nə itirmir. Bu barədə nə deyərdiniz?

- Mövlüd tamamilə haqlıdır: “Ayı meşədən küsüb – meşənin xəbəri yox” misalı.

- İstərdik səhhətinizlə bağlı məlumat verəsiniz. Eşitdik ki, İsrailə müalicəyə getmisiz.

- Babatam. Səhhətim, necə deyərlər, “həştatdandır”, daha doğrusu “səksənbeştən”. Amma İsrailə həmişəlik köçmüşəm, bu barədə facebook səhifəmdə beş gün əvvəl yazmışam: “Qızım sənə deyirəm – gəlinim eşitsin!”

İki vətənim vardı mənim: birisi – doğulduğum, canım-ciyərim, ata-baba yurdum, daima özümü orada gördüyüm Azərbaycan, digəri isə - altmış neçə il yaşadığım, bir şəxsiyyət kimi yetişdiyim, ailə qurduğum, ikinci doğma dil qazandığım Rusiya. İndi isə taleyin hökmü və mənim ixtiyar istəyimlə üçüncü məskənim yaranmaqdadir – İsrail.

Şəhərlər üçbucağı: Bakı, Moskva və el-Quds-Yeruşalaym, üç din şəhəri!.. Kərbəlayi idim, indi Qüdsi də əlavə olundu adıma.

- Mümkünsə son yaradıcı işləriniz barədə də məlumat verərdiniz.

- Yazıram... yazıram... Yaşadığım həyatı-münasibətləri, gördüyüm aləmi-insanları romana bənzər janr-formada dərk etməyə çalışıram, üslubum da məlum: həqiqət + ağrı + ümid.

• Kinetik incəsənətin canlı ideya platforması - Naum Qabonun heykəllərinin sirri
• "Elə yaşamalısan ki, hətta əclafların da yadında qalasan..." - Məşhur aktrisadan aforizmlər
• Məşhur müğənni həm Parkinson, həm də xərçəng oldu