Bu gün görkəmli ispan rəssam Pablo Pikassonun doğum günüdür.

Kulis.az “Palitra” rubrikasında boyakarın “Ağlayan qadın” əsəri haqqında materialı təqdim edir.

Müasir təsviri sənətdə dərin iz qoymuş görkəmli ispan rəssamı və heykəltəraş Pablo Pikasso Malaqa şəhərində anadan olub, ilk rəsm dərslərini atasından alıb.

Akademik rəngkarlığın qəliblərini qıran Pikasso Jorj Brak ilə birlikdə kubizm cərəyanının əsasını qoyub.

Sənətkar formanı həndəsi müstəvilərə bölərək obyekti eyni anda bir neçə bucaqdan göstərmək üsulunu kəşf edib.

Rəssamın yaradıcılığı "Mavi dövr", "Qızılgül dövrü", "Analitik kubizm", "Sintetik kubizm" və müharibə illərinin siyasi yönlərini fəlsəfi müstəvidə təqdim etdiyi mərhələlərdən ibarətdir.

Pikasso tablolarında yalnız vizual dünyanı deyil, insanın daxili dağıntısını, müharibənin dəhşətlərini və mənəvi ağrıları təsvir obyektinə çevirməyi bacarıb.

1973-cü ildə Fransada vəfat edən sənətkarın zəngin irsi XX əsər dünya mədəniyyətinin ən parlaq və təsirli səhifələrindən biri sayılır.

“Ağlayan qadın”

Pablo Pikassonun ən məşhur əsərlərindən olan bu tablo rəssamın İspaniya vətəndaş müharibəsi dövründə, Gernika şəhərinin bombalanmasından sonra çəkdiyi eyniadlı monumental tablonun vizual davamıdır.

Əsərdə fotoqraf və rəssam Dora Maar model olmuşdur. Lakin portretə sadəcə bir qadının kədərinin ifadəsi kimi baxmaq kifayətsiz qalar.

Bu, müharibənin gətirdiyi fəlakətə, itkiyə və çarəsizliyə qarşı bir ananın, ümumilikdə isə bütün bəşəriyyətin acı fəryadıdır.

Tablo hazırda Londondakı Teyt Modern qalereyasında nümayiş olunur.

Rəsmdə qadın siması kubizm üslubunda hissələrə bölünüb. Biz onun gözlərini, burnunu və ağzını eyni anda həm profildən, həm də qarşıdan görürük. Pikasso burada estetik gözəllik axtarmır; əksinə, ağrının insanın üzünü necə eybəcərləşdirdiyini, daxildəki harayın üz cizgilərini necə parçaladığını göstərir. Qadın dişləri ilə dəsmalını çeynəyir, gözlərindən isə damla deyil, sanki iti şüşə qırıntıları tökülür.

Rəssamın seçdiyi rənglər - kəskin sarı, yaşıl, göy və tünd qırmızı tonlar bir-birinə çırpılır. Bu parlaq rənglər bayram əhvalı yaratmır, əksinə, daxili gərginliyi və stresi daha da qabardır. Pikasso qadının kədərini gizli bir otaqda da əks etdirə bilərdi, lakin o, bu ağrını hər kəsin gözü önündə hayqıran bir faciə kimi təqdim edir.

“Ağlayan qadın” sadəcə göz yaşları ilə təsvir olunmuş bir insanın rəsmi deyil, müharibənin vurduğu mənəvi yaranın dondurulmuş anıdır.

• "Qonkur"da süni intellekt qalmaqalı – Məşhur roman siyahıdan çıxarıldı
• Sədaqətsizlik, özünə aid otaq, doğumdan sonrakı zorakılıq... - Feminizm mövzusunda 10 məşhur əsər
• Məişət ilə dəbdəbəni qarşılaşdıran sərgi keçiriləcək