Yazıçılar Birliyinin Gənclər Şurasına yeni seçkilər keçirilib.

Gənclər Şurasının yeni heyətinin siyahısı ilə birgə seçkinin keçirildiyi iclasdan video-reportaj da qurumun saytına yerləşdirilib.

Azərbaycan Yazıçılar Birliyinin nizamnaməsinin III Fəslinin 2-ci bəndində Gənclər Şurasının necə seçilməsinin mexanizmi göstərilir: “Azərbaycan yazıçılarının Qurultayı açıq səsvermə ilə və səs çoxluğu ilə Azərbaycan Yazıçılar Birliyinin sədrini, sədrin təqdimatıyla birinci katibi və katiblərini İH üzvlərini 21 nəfərdən ibarət Gənclər Şurasını, 5 nəfərdən ibarət təftiş komissiyası üzvlərini (adbaad və açıq) seçir”.

Göründüyü kimi Yazıçılar Birliyi kobud nizamnamə pozuntusuna yol verib.

Məsələyə aydınlıq gətirmək üçün əvvəlcə AYB Gənclər Şurasının yeni sədri Elşad Ərşadoğlu ilə əlaqə saxladıq. Elşad Ərşadoğlu deyir ki, onun heç nədən xəbəri yoxdur: “Rəşad müəllim mənə zəng vurdu. Dedi ki, Gənclər Şurasının yeni üzvlərini seçmişik. Sən sədr seçilmisən, Xəyyal Rza da müavinindi. Vaxtın olanda AYB-yə get, siyahıya bax, gör üzvlər kimlərdi. Oturub söhbət edin, gələcək planları danışın. Mən də AYB-yə getdim. Xəyal Rza da müsahibəsində deyib ki, üzvləri qurultay yox, katiblik seçib. ”

AYB Gənclər katibi Rəşad Məcid isə iddia etdi ki, nizamnamədə elə bir müddəa yoxdur və Gənclər Şurasının üzvlərini katiblik seçməli, qurultay təsdiqləməlidir. Nizamnamənin üçüncü Fəslinin II bəndinin tələbini ona xatırlatdıqda Rəşad Məcidin cavabı belə oldu: “Nizamnaməyə qalsa qurultay da beş ildən bir keçirilir”.

AYB-nin mətbuat katibi Xəyal Rza isə bildirib ki, 3-cü bəndin 2-ci hissəsindəki "Gənclər Şurası" ifadəsi nizamnaməyə səhvən düşüb. Çünki nizamnamədə vurğulanır ki, Gənclər Şurası katiblik yanında yaranır. Sədrini Şura üzvləri özləri seçirlər. Xəyal Rza 3-cü bəndin 2-hissəsinə "Gənclər Şurası" ifadəsinin səhvən düşməsini həm də onunla əsaslandırıb ki, həmin müddəada "Ağsaqqallar Şurası" ifadəsi yoxdur: "Gənclər Şurası qurultayda seçilirsə Ağsaqqallar Şurası da qurultayda seçilməli idi. Amma göründüyü kimi nizamnamədə belə bir tələb yoxdur".

• Məşhur müğənni vəfat etdi
• Musiqili Teatrda böyük iddia, cavabsız suallar... - Elvis Presli haqqında tamaşada nə çatışmırdı?
• Qəbələ Beynəlxalq Musiqi Festivalının ilk günündə balet qala-konserti keçiriləcək