Qəşəm Nəcəfzadə

Xocalı mövsümü Fevral

Yanvar ayından başlayır Azərbaycanın
matəm mövsümləri...
Qan fışqırır televizorlar...
Məhkəmələr təzədən işə düşür...
Xocalını göstərirlər...

Oğlum mənə deyir ki, keçən ilki lentdi...
Həmin uşaqdı yanında potu...
Mən ondan kiçik idim,
Böyüyüb keçdim onu - deyir oğlum.

Xocalı mövsümüdür bu ay
Lentin tozu alınır...
Bir də göstərilməyi qaldı gələn ilə .

Xocalını göstərirlər...
Həmin kişidir yenə,
Heç böyüməyib,
Saqqalı ağarmayıb.
Xocalını göstərirlər
Balaca uşaqlar,
Dirsəklənib təpələrə.
Böyüklər uzanmışdı deyə,
Aldanıblar böyüklərə.

Uşaqlar böyür - böyürə
Yan - yana uzansalar da,
Gəlib çatmadılar insafımıza.

Xocalını göstərirlər deyə
qadın keçdi mətbəxə,
Keçən ilki lentdi
Təkrardı təkrar.

Müxbir küçədə
Kəlbəcərin getdiyi günü soruşur
nazlı bir oğlandan,
Guya bilsə nə olacaq,
Ya bilməsə?
Bəlkə Kəlbəcərin mövsümü başlayır
Onun da ayrıdı lentləri
Ölümləri ayrıdı
Ayrıdı dərdləri.
Sonra Zəngilanın ildönümü
Sonra Qubadlının, Ağdamın...

Xocalı mövsümüdü bu ay...
Kişiliyin qısır ayı...

Fırlat qardaş,
Onsuz da işin bu lenti fırlatmaqdı,
Allah gələn iləcən sənə ömür versin
Çünki sən bilirsən bu lentin yerini.

Realist

Qəflətən

Azdramanın səhnəsinə çıxıb

Bütün qəhrəman obrazları

güllələmək keçir könlümdən.

Baş rolda Əlabbas Qədirov

oynasa belə.

Rejissoru Bəhram Osmanov

olsa belə.

Bu il də yenə

Xocalının ad günündə

Azdramaya getdik.

Xocalı faciəsinə

Tamaşa elədik.

Oğlum səhnəyə baxıb dedi:

-Ata, bura televezorun içidir?

Xocalı uşaqlarının soyuqdan

Donduğunu görəndə,

Uşağımızın paltosunu

Yaxşıca düymələdik.

əlinə peçeniye verdik,

üzündən öpdük

Başını sığalladıq.

Arxamızda qalın geyinmiş

Böyük adamlar əyləşib.

Maşallah çox yaxşıdılar.

Əgər tapançam olsaydı,

səhnəni tamaşaçı salonunua,

salonu səhnəyə çevirərdim bu saat.

Ən birinci özümü güllələyərdim.

Səhnədəki xocalılar

Oyunlarını yarımçıq qoyub

Zala baxardılar.

Mənim gözlərim uşaq gözləri

Kimi ölür.

Ayaqlarım uşaq ayaqları

Kimi donur.

Bax, sinəm uşaq sinəsi kimi balacadı,

Ürəyim sönür.

Yanımdakı tamaşaçıların

Daz başları

Ağdamın təpələri kimi

Qoymur məni

O üzə aşam

Başlarındakı tək-tək tüklər

Tikan kimi əlimə batır.

İcra başçısı çiynimdən

Tutub bərk-bərk məni basır aşağı:

Mən sənin başçınam

Sən burda ölməlisən.

Çölə çıxsan

Prezident deyər

Xocalını kim buraxıb şəhərə

Məni işdən çıxardar.

Xocalı gərək öz yerində

Şəhid olsun.

Ay camaat, mən öz yerimdə ölürəm eeeyy.

25 Fevral 1993

Qara günün çəkilişi

26 fevralda qalın geyinin

Yaxşıca yeyin.

Video kameraları sazlayın

Ssenarilər yazın.

Divarlara meyit şəkilləri yapışdırın.

Adamları Xocalıdan xatirə

Danışmağa çağırın.

Palto geyinsinlər

Yan-yana düzülsünlər.

Humay arvadı tapın

O danışsın, camaat ağlasın.

Axırda bir dənə bayatı desin...

Sabaha ümidli olduğunu

Söyləsin.

İşıqlı evdə yaşadığını desin.

İcra başçısından

Razılıq eləsin.

Qoca kişiləri gətirin

Saqqallarındakı ağ işığı çəkin.

Bir az başı aşağı çəkin.

Qəmli-qüssəli çəkin.

İmişlidə dəmir yolu

Vaqonunda yaşayan

Gülgəz arvadı axtarın.

Tapmasanız keçən ilki lenti

Təkrar göstərin.

- Necəsən, xala?

- Yaxşıyam, bala

Bəs kişi hanı?

- Xocavənddə öldürdülər,

Başına dönüm.

- Bəs oğlun hanı?

- Şuşada öldürdülər,

Başına dönüm.

- Bəs qızın hanı?

Xocalıda əsir düşdü,

Başına dönüm.

- İndi özünü necə

Hiss eləyirsən?

- Çox yaxşyam,

Başına dönüm.

Bu səhnəni televiziyanın

Qızıl fonduna salın.

Adamlara danışmaq öyrədin.

Xocalıdan xatirə danışdırın.

Günahkarı söydürün.

Kadrlara meyit şəkilləri salın.

İşğal olunan rayonların

İcra başçıları ilə məsləhətləşin.

Yaxşı danışa bilənlərin

Siyahısını onlardan alın.

Deputatları qabağa verin.

Yanların qaçqınları düzün.

Lap axırda soyuqdan

Donmuş bir uşaq ayağı çəkin.

• “Kiçik əllərin yaşıl dünyası” adlı sərgi açıldı
• "Ustad və Marqarita" filmi Amerikada nümayiş etdiriləcək
• Emir Kusturitsa Putin haqqında film çəkmək istəyini dilə gətirdi