“Tanrı quşu gəlmədi” tamaşasının premyerası keçirildi

“Tanrı quşu gəlmədi” tamaşasının premyerası keçirildi
30 oktyabr 2024
# 09:28

Azərbaycan Dövlət Akademik Milli Dram Teatrında yazıçı-dramaturq Cavid Zeynallının eyniadlı pyesi əsasında hazırlanan “Tanrı quşu gəlmədi” tamaşasının premyerası keçirilib. Səhnə əsəri Mədəniyyət Nazirliyinin dəstəyi ilə “Bölgə teatrlarının Bakı premyeraları” adlı yeni layihə çərçivəsində Lənkəran Dövlət Dram Teatrının təqdimatında nümayiş olunub. Psixoloji-dram janrlı səhnə əsərinə teatrın baş rejissoru Anar Babalı quruluş verib.

Kulis.az xəbər verir ki, “Tanrı quşu gəlmədi” tamaşası öz ilkin və həqiqi mahiyyətindən qopan, mənəvi xilasını keçmişdə, uşaqlığında axtaran Süleyman Əfəndiyevin faciəvi taleyindən bəhs edir. Doğulduğu kənddə onun bütün keçmiş günahlarından xəbərdar olan sonuncu adam öləndən sonra Süleyman kəndə qayıtmağa qərar verir. Kənddə onu çox şey gözləyir: doğulduğu və indi ömrünün ixtiyar çağında sığınmaq istədiyi ev, doğmalarının xatirəsi, həyatını məhv etdiyi qadının qisası, ondan üz döndərən Tanrı quşu...

Süleymanın oğlu Mustafa onun kəndə qayıtmağının əleyhinədir. Bu münaqişə tamaşada bir çox həqiqətlərin - yalan və günahların üzərinə işıq salır, sevgidən doğulmayan insanın bədbəxtlik girdabında necə çırpındığını tamaşaçıya göstərir.

Süleyman həyatının acı həqiqətləri ilə üz-üzə qalıb, ən sonda qovuşmaq istədiyi “Tanrı quşu”nun qurbanına çevrilir. Süleyman quş dilini də bilmir. Mistik və mifik obraz olan “Tanrı quşu”nu Allahın insana əmanət etdiyi vicdan hissinin ümumiləşmiş adı da hesab etmək olar.

Səhnə əsərinin quruluşçu rəssamı Tərlan Sadıqov, bəstəkarı Aydan Əliyevadır. Tamaşada rolları Xalq artisti Qabil Quliyev, aktyorlar Qızılgül Quliyeva, Saleh Əzimzadə, Gülər Kərimova, Məleykə Cəfərova, Elçin Hacıyev, Əlizamin Abbasov, İmaməli Əskərov və Zeynal Məmmədzadə ifa edirlər.

Qeyd edək ki, Lənkəran teatrı layihə üzrə oktyabrın 30-da Xalq yazıçısı Kamal Abdullanın eyniadlı əsəri əsasında hazırladığı “Casus” tamaşasını da Akademik Milli Dram Teatrında nümayiş etdirəcək.

Layihənin məqsədi bölgə teatrlarının yaradıcı həyatını stimullaşdırmaq, gənc rejissorların quruluş verdiyi tamaşaları paytaxt sakinlərinə təqdim etməkdir. Bu layihə 2025-ci ilin martınadək davam edəcək.

# 1265 dəfə oxunub

Oxşar xəbərlər

Musiqili Teatrının direktoru Əliqismət Lalayev işdən çıxarıldı

Musiqili Teatrının direktoru Əliqismət Lalayev işdən çıxarıldı

18:18 4 aprel 2025
Kukla Teatrının aprel repertuarı

Kukla Teatrının aprel repertuarı

15:03 1 aprel 2025
"Xurşidbanu Natəvan"  Şəki Dövlət Dram Teatrında

"Xurşidbanu Natəvan" Şəki Dövlət Dram Teatrında

13:55 1 aprel 2025
Prezident İlham Əliyev Şəfiqə Məmmədovaya “İstiqlal” ordenini təqdim edib - FOTOLAR

Prezident İlham Əliyev Şəfiqə Məmmədovaya “İstiqlal” ordenini təqdim edib - FOTOLAR

12:58 29 mart 2025
Naxçıvan Dövlət Milli Dram Teatrı  Türkiyədə festivalda - Fotolar

Naxçıvan Dövlət Milli Dram Teatrı Türkiyədə festivalda - Fotolar

12:19 29 mart 2025
Şəfiqə Məmmədova “İstiqlal” ordeni ilə təltif edilib - Sərəncam

Şəfiqə Məmmədova “İstiqlal” ordeni ilə təltif edilib - Sərəncam

11:37 29 mart 2025
#
#
# # #