[b]Gecələri üşümür ki, şəkərbura ayağın? – Cəlil Cavanşirdən[/b] YENİ ŞEİRLƏR

[b]Gecələri üşümür ki, şəkərbura ayağın? – Cəlil Cavanşirdən[/b] YENİ ŞEİRLƏR
23 oktyabr 2017
# 11:00

Kulis.az Cəlil Cavanşirin yeni şeirlərini təqdim edir.

Təkliyi gizlədən divarların o üzünə...

Qızım Cansel üçün

Dizlərimi qucaqlayıb söykənirəm divara,

Əllərim qoynumda donur, hey baxıram tavana

Bu divarlar nə qəddarmış,

Düz üstümə gəlirlər.

Lənətə gəlmiş təkliyim, güzgülərdə görünmür

İndi məni ovutmayır divardakı rəsmlər...

Qızım, səni düşündükcə,

düyümlənir boğazım

Sən gedəndən ağlayıram, sən gedəndən bomboşam.

Tavandakı ləkələrlə, danışıram, susuram.

Sən getdiyin iki aydır, özümdən yorulmuşam...

İndi bütün nəğmələrin hüznü sənin gedişin,

İndi mənim əzablarım darıxmaq yox,

dirigözlü ölümdü.

Bir gün yəqin anlayırsan, anlayarsan atanı.

Səndən ayrı yaşamağım, ömür deyil zülümdü.

Saçlarını, gülüşünü unutmaqdan qorxuram,

Saçlarını, gülüşünü, baxışını sevdiyim.

Qorxuram ki, böyüyəsən mən görməyim boyunu

Qorxuram ki, ölüb gedəm, səni bir də görməyəm

Səni sıxar bu əcaib bəxtimizin oyunu...

Lənət olsun bu taleyə, hərəmiz bir tərəfdə

Nə yanında qardaşın var nazınla oynayası,

Nə anan var, gecələri sığınasan köksünə

Bəlkə sənə şirin gələr hələ nənə laylası...

Sən olduğun şəhərdə də havalar çox soyuyub

Gecələri üşümür ki, şəkərbura ayağın?

Səndən elə nigaranam, canım qızım, biləsən

Əsil adı işgəncədir, bu dərdli darıxmağın...

Mən daşını çoxdan atdım insantək yaşamağın...

Orda yağışlar başlasa qollarını geniş aç

Bəlkə mənim göz yaşlarım sənə çatar yağışla...

Gözlərinə qurban olum, mənim üçün darıxma

Mənim bəxtim nəhs gətirib, bir lənətli qarğışla

Bacarırsansa xatırla,

bir də...

məni bağışla...

Ömrün sonuna doğru

bir sabah da oyanıb inciyərsən günəşdən

pəncərədən boylanıb, yorarsa gözlərini...

deyinərsən,

susarsan.

günəş çıxar aradan,

qaranlıqdan qorxarsan...

yumarsan gözlərini...

Hərdən gecə yarısı qaranlıqdan küsərsən

inadla bir siqaret yandırarsan, közərər.

ağlayarsan...

gülərsən...

günəş ilə barışıb

sarılarsan yastığa

yumarsan gözlərini...

bir də ömrün içində, yaşamaqdan bezərsən

daha əlçatmaz olar gedənlərin dönüşü.

sevərsən,

ayrılarsan...

qısılarsan özünə

alışarsan yoxluğa

yumarsan gözlərini...

# 3029 dəfə oxunub

Oxşar xəbərlər

Nizaminin "Sirlər xəzinəsi"ndə  ölüm məqamları - Fərid Hüseyn

Nizaminin "Sirlər xəzinəsi"ndə ölüm məqamları - Fərid Hüseyn

09:00 11 iyul 2025
Cenifer Lopezin konsert turu başlanıb

Cenifer Lopezin konsert turu başlanıb

17:30 10 iyul 2025
"Bu hekayə qarpız alverçilərinin etdiyi söhbətləri xatırlatdı mənə" – MÜZAKİRƏ

"Bu hekayə qarpız alverçilərinin etdiyi söhbətləri xatırlatdı mənə" – MÜZAKİRƏ

15:03 9 iyul 2025
"Oxu, başına dönüm!"  - Gülhüseyn Hüseynoğlu

"Oxu, başına dönüm!" - Gülhüseyn Hüseynoğlu

10:47 8 iyul 2025
İtirilmiş nəslin şairi - O niyə gənc olmaqdan bezmişdi?

İtirilmiş nəslin şairi - O niyə gənc olmaqdan bezmişdi?

11:26 7 iyul 2025
Zorakılığa məruz qalan sistemin bir parçası olmaq... - Nuran Yaqub

Zorakılığa məruz qalan sistemin bir parçası olmaq... - Nuran Yaqub

13:50 5 iyul 2025
#
#
# # #