Dünya ədəbiyyatında müəllifləri hədəf alan yeni dələduzluq sxemləri genişlənir.

Kulis.az xəbər verir ki, yazıçılara saxta kitab klublarından dəvətlər, məşhur ədəbi agentliklərdən gəlirmiş kimi görünən məktublar və əsərlərinin "Netflix", "Paramount" kimi şirkətlər tərəfindən ekranlaşdırılacağına dair vədlər göndərilir.

Dələduzlar ilk mərhələdə müəlliflərə özlərini nüfuzlu kitab klublarının nümayəndələri kimi təqdim edirlər. Bəzən onlayn görüşlər təşkil olunur, yazıçıların kitabları haqqında süni şəkildə hazırlanmış suallar verilir. İlk baxışdan bu fəaliyyətlər adi ədəbi müzakirə təsiri bağışlasa da, sonradan iştirakçılardan pul tələb edilir.

Məlumata görə, bəzi müəlliflərdən kitablarının reklamı, sosial şəbəkələrdə tanıdılması, nəşrə hazırlanması və film hüquqlarının satışına vasitəçilik adı ilə ödəniş istənilir. Tələb edilən məbləğlər 55 dollardan 350 dollara qədər dəyişir. Ayrı-ayrı hallarda yazıçılar yüzlərlə dollar ödədikdən sonra qarşı tərəfin saxta şirkət olduğunu anlayıblar.

Britaniya Yazıçılar Gildiyası son aylarda şübhəli təkliflərlə bağlı müraciətlərin kəskin artdığını bildirir. Müəllifləri təmsil edən təşkilatların bəzilərinə həftə ərzində onlarla belə şikayət daxil olur. Dələduzların fəaliyyətində generativ süni intellektin də rolu var: saxta məktublar, kitab müzakirələri və şəxsi müraciətlər daha inandırıcı formada hazırlanır.

Bu hadisələr göstərir ki, kitabını nəşr etdirmək və ya ekranlaşdırmaq istəyən yazıçılar üçün nüfuzlu görünən hər təklif etibarlı deyil. Ədəbiyyat dünyasında tanınmaq arzusu artıq dələduzların istifadə etdiyi vasitələrdən birinə çevrilib.

• “Gözəl və Bədheybət” təqdim olundu
• Harri Staylsın turu əsasında film çəkiləcək
• Suyun altında qədim amforalar tapıldı