Kulis.az Tural Turanın yeni şeirlərini təqdim edir.

Kəsin tanrının əlini

Özünüz yaza biləcəksinizsə alın yazınızı,

Kəsin alnınızdan tanrının əlini.

Kəsin ki, muxtariyyətinizə müstəqillik ala biləsiniz.

Ana yasanızı təzədən yazın alnınıza...

Tanrını sevdiyim qızın gözlərində tapmışdım,

ayaqlarında da dəfn elədim...

Dünyadakı axırıncı tanrı da

son nəfəsimlə can verəcək...

Təbiətin beşinci fəsli ölümdür,

yorulanda dayandırın vaxtınızı,

dadı damağınızda qalsın dünyanın...

Evlisinizsə, siz də bir tanrısınız,

öləndə də ölümsüzlüyünüzə inandırın

uşaqlarınızın anasını.

Çünki uşaqlarınız da analarına inanır...

...Bütün qiyamətlər pəncərələrdən başlayır,

Evinizə pəncərə qoymayın,

pəncərə şəkli çəkin təsəlli üçün...

Ölməyə pilləkan yaxşıdır,

Qəbrinizi də yataq otağınızda qazdırın,

Xəyanətsizlikdən əmin olmaq üçün...

29 aprel 2019

Bakı

***

Küçələr kölgəsindən tanıyır adamı,

qapılar yerişindən.

Güzgülərsə baxışlarından...

Bircə qəbirlər tanımır adamı,

bir də tanrı...

Həmişə tanımadıqlarımız sahib çıxır bizə.

Xoşbəxtlik son nəfəsdən başlayır

Çünki bir daha onu görə bilməyəcəksən.

Görə bilmədiklərinə özənir adam...

28 aprel 2019

***

Dünyanın ilk sözü gülüşdür,

hələ də bütün dillərdə eyni yazılır.

Göz yaşlarının hərflərini

tanrı da kəşf etməyib hələ...

Göz yaşları quruyanda ölür adamlar,

göz yaşları quruyanda

qəbirlərin üstünü ot basır.

Hər səhər ağlamağı məşq edin,

bəlkə ölmədiniz...

26 aprel 2019

• Azərbaycan onun üçün həbsxana idi... - Nazir qızının qərib taleyi
• "Mirvari"də balıq qonaqlığı, gavur Hüseyn və üç manat iyirmi qəpik - İsmayıl Şıxlını tanımayan qız kim idi?
• Dünya şöhrətli aktyor karyerasını bitirir