Kulis.az tanınmış şair Dilsuzun yeni şeirlərini təqdim edir

NƏ BİLƏSƏN...

Dişləyəndə ağrıyırmı alma?

Çiçək də məst olurmu

insan ətrindən?

Su buz olmaq istəyir, yoxsa buxar?

Dəniz də islanırmı

yağışlı havalarda?

Londonda,

Santyaqoda,

Seulda

birdirmi ana bətninin ekologiyası?

Niyə günəş dəyirmi,

pəncərələrimiz dördküncdür?

Ağac, yamyaşıl ağac

ağzı ovxarlı baltadan çox qorxur,

yoxsa quraqlıqdan?

Heyvanların da

ərəbi, yəhudisi, hindlisi varmı?

Cənnət yaxındadı, ya cəhənnəm?

O dünyada da

ermənilərlə qonşu olacağıq?

Şuşadan da uzaq yer varmı kainatda?

Nə biləsən...

BÖYÜK İNSANIN ÖLÜMÜ

İsmayıl bəy Qaspıralının əziz xatirəsinə

Gün günortadan əyildi.

Bütün evlərimizdən

qaldırdıq tabutunu,

Bütün qəbirstanlıqlarımızda

dəfn etdik səni.

Yerin behişt olsun.

Qəbrin nurla dolsun.

Amin.

DUA

Dənizin ortasında

parça-parça olmuş bir qayığam -

Duz yandırır yaralarımı...

Saman çöpünə çatmır əlim,

Uzaqlarda,

lap uzaqlarda

qəfil ümid kimi

peyda olmuş bir gəmi

birdən-birə dəyişir səmtini –

Üz tutur qüruba doğru...

Budur, axıb qurtardı günəşin qanı.

Göydənmi endi,

dalğaların arasındanmı çıxdı

kaftar gecə?

Vurnuxur ətrafımda

qismətini axtaran bir köpəkbalığı

Və heç nə gəlmir ağlıma

şəhadət kəlməsindən-

duadan savayı...

***

Qorqud dədə

üstəgəl

Molla Nəsrəddin

üstəgəl

Məhəmməd Füzuli

üstəgəl

Mirzə Fətəli Axundzadə

üstəgəl

Həsənbəy Zərdabi

üstəgəl

Mirzə Ələkbər Sabir

üstəgəl

Cəlil Məmmədquluzadə

üstəgəl

Üzeyir bəy Hacıbəyli

üstəgəl

Səttar Bəhlulzadə...

Səttar Bəhlulzadə...

Səttar Bəhlulzadə...

İlahi, biz niyə belə azıq?

YA MƏNƏ BELƏ GƏLDI?

İndicə burada –

Gülhanə parkında,

şabalıd ağaclarının altında idilər:

Nazim Hikmət,

Abidin Dino,

bir də İbrahim Balaban...

Ya mənə belə gəldi?

Gül səbətlərinin,

uşaq arabalarının

və göy qübbəsindən sallanan

yelləncək iplərinin arasında

heyrətlə baxırdılar İstanbula...

İstanbul da İstanbuldu ha! -

köksündə – ürək yerinə mavi dəniz,

boynunda – şərf yerinə

allı-güllü yaz mövsümü...

Ya mənə belə gəldi?

İndicə burada –

Gülhanə parkında,

şabalıd ağaclarının altında idilər:

birinin əlində

infarktdan dəlik-deşik olmuş ürək,

birinin əlində

qaranlığı dəlmək üçün

günəşdən düzəltdiyi külüng,

birinin də əlində

boyası qurumuş fırça...

Torpaq çanaqlarda

günəşin şəfəqlərini içə-içə

türkü oxuyurdular:

“Sən yanmasan,

mən yanmasam,

biz yanmasaq –

Necə çıxar qaranlıqlar aydınlığa...”

Ya mənə belə gəldi?

İndicə burada –

Gülhanə parkında,

şabalıd ağaclarının altında idilər...

Yox oldular...

Deyəsən, ömrün o üzünə keçdilər...

Ya mənə belə gəldi?..

ÇADIR ŞƏHƏRCİYİNDƏN REPORTAJ

Yusif Səmədoğlunun əziz xatirəsinə

Axşam namazından sonra

böyrü-başı dəlik-deşik bir çadırda

bir qarı köks dolusu bir ah çəkdi!

“Yer üzündə yerimiz yox,

Göy üzündə göyümüz yox,

Gücümüz yox, heyimiz yox...

Səni dağılasan, dünya!”

Bu ahdan

çatladı göy qübbəsi –

Sapı qırılmış

təsbeh dənələritək

dağıldı ulduzlar,

Ay – namnazik yemiş dilimi

qopub düşdü yerə...

Qurudu irmaqlar.

Yandı, kül oldu dağlar.

Nə göy üzündə göy qaldı,

Nə yer üzündə yer...

Ora bax... Ora bax...

Bu vurhavurda

başını götürüb,

şeytan buludların arasıyla

harasa qaçır Allah...

HAQQ QAPISI

Əynimizin buzdan kürkü -

Nə yamanmış tanrı görkü...

Görən bu dən nə dəndi ki, -

Əkən əkər, biçən biçməz.

Budaqlara qonan quşdu,

Sinəsi gülləyə tuşdu...

Baş açmıram bu nə işdi –

Atan atar, uçan uçmaz.

Dünya bağlı bir qəfəsdi,

Çırpınırıq... Yox, əbəsdi.

Son taqətdi, son nəfəsdi –

Qovan qovar, qaçan qaçmaz.

Bilinmir axşamla səhər,

Bilinmir sevinclə kədər,

Bilinmir şərbətlə zəhər –

Tökən tökər, içən içməz.

Göy üzü göy buludludu,

Yer üzü məxmər otludu.

Dünya beləmi dadlıdı –

Doğan doğar, köçən köçməz.

Günlər quştək qanadlıdı.

Hərə bir cür ümidlidi...

Haqq qapısı kilidlidi –

Döyən döyər, açan açmaz.

BİZİM ƏSGƏR

(Mahnı mətni)

Azərbaycanın Milli Qəhrəmanı

Mübariz İbrahimovun əziz xatirəsinə

Xor: Yaşa, yaşa, sən yaşa, vətən,

Yaşa, yaşa, min yaşa, vətən.

Ana: Buludtək dolaram, laylay,

Çiçəktək solaram, laylay.

Vətənə qurban olanın

Qurbanı olaram, laylay.

Mələklər: Sən cənnətə xoş gəldin,

Şan-şöhrətə xoş gəldin,

Qibləgaha xoş gəldin,

Səcdəgaha xoş gəldin -

Qarabağa xoş gəldin!

Müğənni: Şəhidlər ocağına –

Azərbaycan torpağına

xoş gəldin!

Xor: Cəsur ərlərə eşq olsun!

Cəngavərlərə eşq olsun!

Müğənni: Bizim əsgər igid olur, mərd olur,

Düşmən görsə, qəzəblənir, sərt olur.

Qurd oğludu – döyüşlərdə qurd olur,

Fikri-zikri, tək amalı yurd olur.

Ana: Sarı zəmi biçildimi,

Soyuq sular içildimi,

Səbrimiz tükəndi, daşdı,

Düşmən səddi keçildimi?

Müğənni: Vətən eşqi qüvvət oldu qoluna,

Əldə silah – çıxdın zəfər yoluna.

Arxanca minlər, milyonlar gələcək,

Neçə-neçə qəhrəmanlar gələcək.

Ana: Toplar-tüfənglər dinsin,

Dağlar-daşlar ərisin.

Şir ürəkli igidlər

Düşmən üstə yerisin!

Müğənni: Bir budaq da vətəndi,

Bir yarpaq da vətəndi,

Bir bulaq da vətəndi, -

Heç nə bədniyyətə qalmasın,

Qisas qiyamətə qalmasın.

Xor: Yaşa-yaşa, sən yaşa, vətən,

Yaşa-yaşa, min yaşa, vətən.

CƏNUBDAN ƏSƏN YAZ

Cənubdan əsən yaz

Bu dünyanın

dağından, düzündən keçir,

çopur üzündən keçir...

Gözün aydın, dünya!

Çiçək çiçəklə sevişir,

Böcək böcəklə sevişir,

Quşun quşa qaynayır qanı,

Daşın daşa qaynayır qanı...

Cənubdan əsən yaz

Yuyur, bu dünyanın pasını yuyur,

Dərdini, qəmini, yasını yuyur...

Yarpaq işığında, gül işığında,

Durna işığında, su işığında

On doqquz yaşına girir qovaqlar,

Söyüdlərin hörükləri topuqlarını döyür.

Gözün aydın, Tuqay meşələri!

Gəlin oldu ağacların –

İnnən belə qarımazsan,

İnnən belə qurumazsan.

Cənubdan əsən yaz

Araz olur – lillənir,

Kəpəz olur – güllənir...

Gözün aydın, Murov dağı,

Əriyib qurtardı qarın.

Qaldı

mənim içimdəki ağrı-acı...

Cənubdan əsən yaz,

Mənim əkdiyim ağaca da qon!

Sal üstünə yarpaq-yarpaq ağırlığını,

Sal üstünə çiçək-çiçək ağırlığını...

Bu əriyə nə olub?

Bu ağacı kim güldürüb?

Bu gilas bu qədər gözlə nəyə baxır?

Cənubdan əsən yaz

Yurduma çırpır qanadlarını,

Ürəyimə çırpır qanadlarını,

Şerimə çırpır qanadlarını...

• Azərbaycan Vaşinqtonda keçirilən 11-ci Beynəlxalq Qış Sərgisində
• Beyonsun yaradıcılığı dərsliklərə salınacaq
• Məşhur aktyor haqqında film çəkiləcək