Kulis.az Ceyms Coysun şeirlərini təqdim edir.

Təklikdə

Gecəni duvağa döndərir

Ayın qızılı-boz tülləri,

Yatmış gölün işıldayan səthində

Sürünür sarısalxım tükcükləri.

Tülkü qamışlar gecəyə bir ad pıçıldayır...

Bu, onun adıdır...

Könlüm isə xumarlanıb qəşş eləyir,

Yaman utanıbdı.

Ba! Oğlan

(Bu şeiri C.Coys "Nəvəsinin doğulması və ardınca tezliklə atasının ölümü münasibəti ilə" yazıb)

Qaranlıq keçmişdən

Uşaq doğuldu;

Sevinc və qüssəylə

Qəlbim ovuldu.

Beşikdə sakitcə

Keçir günləri.

Sevər və şükr edər

Baxan gözləri!

Gənc həyat nəfəs verir

Şəffaf şüşə üstünə;

Yeni bir ömür gəlir

Ötüb keçməyə.

Uşaq yuxlayırdı:

Keçindi qoca.

Əfv et oğlunu,

Oh, atılmış ata!

Bahnhofstrasse*

Lağlağı gözlər təki yol göstərər

Ötüb getdiyim yerdən işarələr,

Boz yolumun bənövşəyi nişanları

Görüşüb rəqs eləyən ulduzlardı.

Ah, məşum əzab ulduzu!

Həm çılğın gənclik atıb bizi,

Həm tanımır qoca qəlbin kamallığı

Yolum üstdə lağ eləyən nişanları.

(*Sürixin mərkəzi küçələrindən biri)

Yer və göyün simləri

(C.Coycun “Kamera musiqisi” kitabının ilk şeiri)

Şirin musiqi çalır

Yerin, göyün simləri;

Söyüdlər görüşən yerdən

Axan çayın simləri.

Çay boyunca bir nəğmə var

Sevgi didərginlərinə,

Saçında tünd yarpaqlardı,

Solğun güllər - köynəyində.

Həzin havaya bürünüb,

Mahnıya bənd olub başlar,

Bir alətin üzərində

Gəzişir bütün barmaqlar.

Oxu zalı

Tərcümə etdi: Sadıq Məmmədli

• Tanınmış jurnalisti 19 yaşlı oğlu öldürdü
• Milli Konservatoriyada musiqi təhsili ilə bağlı müzakirə aparıldı
• Xalq düşməninin nəvəsi: "Mircəfər Bağırovu babamın ifadəsinə görə güllələyiblər" - Müsahibə