news-inner
clock14:03 calendar-gray 30 Aprel 2014 view-gray3154 dəfə oxunub
view-gray3154 dəfə oxunub

Mən səni də istəyirəm, o fahişəni də!

Kulis.Az gənc şair Şəhriyar del Geraninin şeirlərini təqdim edir...

Dənizə Atılmış Balıq Şəkilləri

daha sən bu evdə

heç kəsin heç nəyi deyilsən anam...

saatla yanaşı asılmış şəklin də heç divarın deyil.

dolabda asılı qalan kəlağayın qədər başsızam indi,

məncə

bütün yetimçələr

nə vaxtsa fotosu itmiş çərçivələrdi...

indi

bu atılmış və tərk edilmiş bədənlərimizlə

heç kəsin heç nəyi deyilik, anam...

hər gün çiyinlərimdə gəzdirdiyim təkliyimlə baş-başayam

təkliyimi çoxaldan dostlar da yox artıq

hər gün evə dörd qardaşın boşanmış bacısı kimi gəlirəm

daha mən bu evdə dörd divarın iylənməyən sadiq gəliniyəm anam...

bütün darıxmaqlarıma sənin adını qoymuşam,

mən nə vaxt sənsiz olmuşamsa kimsəsiz olmuşam

indi məni üzən kimsəsizlik yox,

daha çox heçkimlikdi.

sevgisiz yaşamaq da

ümidsiz bədənlə gəncliyə düşmüş əsirlikdi...

hər kəs öz ömrünün ən naşı qoca bələdçisidi, anam,

allahın ən sevimli bəndəsi hələ doğulmayan bəndəsidi...

niyə belə bütün tərəflərimə uzaqsan?..

indi mənə yağışdan yaxın, küləkdən doğma heç nə yoxdu bu şəhərdə.

yağış yağırsa bu şəhərə,

qəbrinə də yağır demək.

külək əsirsə bu küçədən,

nə vaxtsa bir gün

örpəyindən də əsib demək...

indi mənə səndən ögey heç kəs yoxdu demək bu şəhərdə...

sən bilməzsən anam,

yer üzü kimsəsizlər üçün nə deməkdi...

sən bilməzsən anam,

yer üzündə kimsəsizlər nə qədərdi...

axı nə fərqi var?!

Dünya dediyin təklər üçün ən son yaşamalı yerdi...

yəni,

yer üzündəki bütün kimsəsizlər

dənizə atılmış balıq şəkilləridi...

səndən sonra heç kəsi sevə bilmədim,

deyim biləsən.

səndən sonra bütün qadınlar qadın oldu eləcə.

qolları qucaq olmadı,

dizləri baş qoymalı,

baş götürüb gedən ayaqları oldu eləcə...

heç nə ovundurmadı məni

xəbərin olsun,

zəngli saat kimi

öz-özümə ovunmağı öyrəndim...

sən də belə etmə, gözüm...

səni and verirəm suda və quruda yaşayanların xatirinə

getmə dedim…

unudulmaqların ən gözəli ana bətnində unudulmaqdı olsun,

yəni, heç doğulmamaq…

məni belə səs-küylü unutma,

elə unut polislər də xəbər tutmasın dedim…

heç kəs sənin kimi sığal çəkə bilmir dedim,

barı əllərini qoyub gedəydin dedim,

hansı ki

sənə oxşadıb sevmişdim onu,

sənə oxşatmışam deyirəmsə

“sevmişdim” artıqdı demək, bilirəm, anam,

hansı ki

sən də yadımda qalmamısanmış demək...

ən son unudacağın adam da

elə özünsənmiş demək bu şəhərdə

yəni

ən doğma adamınsanmış kimi

öz boynuna sarılmaqmış təklik dediyin...

***

Sevgi – dodaqlardan çox ayaqların rəqsidi

durursan

və kimdənsə gedirsən...

indi bədənində gecə yarısıdı

axşam vaxtıdı

toxunulmazsan...

dəniz kimisən indi

balıqlara yüksən

məndən soruşsan

daha çox “yoxsan” indi...

ata olur adamlar, ana olur

bir az bacı olur hərdən…

dost olur adamlar, qardaş olur

doğma olur hərdən…

məndən soruşsan

daha çox “yox” olur adamlar...

Mən ağrıyan biriyəm

darıxqan biriyəm

mən səni də istəyirəm

o fahişəni də,

mən dəvə də istəyirəm

küçə itlərini də.

bax, sağlığına yox

ölümünə içirəm bu şərabı.

məndən soruşsan

mən axmağın biriyəm...

Bir qadın düşün – tərk edilmiş

bir uşaq düşün – atılmış

və bir ana düşün – qadın kimi atılmış,

uşaq kimi tərk edilmiş

heç ana olmamış qadın...

kişilərin ən yaxşısı yanında olandısa

qadınların ən xoşbəxti doğulmayandı...

ən yaxşı halda ata olur kişilər

məndən soruşsan

ən yaxşı halda OLMUR kişilər...

anam kimisən

o xəstə qadın kimi

saçların tökülüb

daha əvvəl barmaqlar tökülüb saçlarından...

anam kimisən

o xəstə qadın kimi

ayaqların yer tutmur

daha əvvəl ayaqqabısız qalıb ayaqların…

indi

qırışmış yataq qədərsən bu yer üzündə...

indi

yaxşı qoru xərçəngi

ki,

allah dediyin

ciyərlərinə tapşırıb onu...

ümidlisən

gəlməyənlər daha çox “gələcək”di indi

oğlun daha çox əlil arabasıdı

qızın daha çox tibb bacısıdı

məndən soruşsan

ümidlər daha çox gəmi kapitanıdı

o səni tərk edən yox

səninlə boğulandı...

bir də

sevgi – dodaqlardan çox ayaqların rəqsidi

durursan

və kimdənsə gedirsən...

indi bədənində gecə yarısıdı

axşam vaxtıdı

toxunulmazsan...

dəniz kimisən indi

balıqlara yüksən

məndən soruşsan

daha çox “yoxsan” indi...

bir də

ata olur adamlar, ana olur

bir az bacı olur hərdən

dost olur adamlar, qardaş olur

doğma olur hərdən

məndən soruşsan

daha çox “yox” olur adamlar...

***

ay allah, bilmirəm nəyinəm sənin,

bəndənəm? itinəm? – bağışla məni...

mən daha hər şeydən üz döndərmişəm,

daha hamı kimi sevmirəm səni...

atılmış bədənəm, keçilmiş yolam,

SƏN adlı sevdaya çətin tutulam,

anam da yoxdu ki, deyə - ay oğlum,

ver mənə, ver tutum qoy əllərini...

bir günah da yoxdu batıb ölməyə,

üzümüz də qalmıb tüpürülməyə,

nə var qollarına axı gəlməyə

atıb bu qadının çiyinlərini...

Oxşar xəbərlər

Xəbər lenti

Akademikin yeni kitabı təqdim olundu
15:20 24 Sentyabr 2021
Dükanlara borclu qalan Xalq artistimiz: O, yerişini də itirmək üzrədir...
14:30 24 Sentyabr 2021
“Səs Azərbaycan” başlayır: Münsiflər kim olacaq? - Foto
14:15 24 Sentyabr 2021
Yazıçımızın kitabı Sankt-Peterburqda çıxdı
13:45 24 Sentyabr 2021
Qızları güldürməkçün sənin kimi xaç çəkərdik - Azərbaycanlı şair Roma Papasına şeir yazdı
13:01 24 Sentyabr 2021
Rusdilli olmaq başqa, rus dilini bilmək başqa: Özünə hörmət etməyən kimlərdir?
12:15 24 Sentyabr 2021
Ana dilini bilməyən nankorlara - Günün şeiri
11:38 24 Sentyabr 2021
Musa Yaqub xanımının məzarı üstündə şeir oxuyur - Video
11:01 24 Sentyabr 2021
Qızı ilə rusca danışan Elgiz
10:30 24 Sentyabr 2021
İbrahim Tatlısəs 12 il sonra konsert verdi - Video
10:02 24 Sentyabr 2021
Qərb ölkələrini fəth edən Azərbaycan mahnısı - Onu necə lağa qoydular?
09:01 24 Sentyabr 2021
Bir gəncin anormal istəkləri – Orxan Bahadırsoydan 18+ hekayə
21:00 23 Sentyabr 2021
Bakıda simfonik musiqi axşamı keçirilib
19:01 23 Sentyabr 2021
Rejissorumuzun filmi Batumidə nümayiş olunub
18:21 23 Sentyabr 2021
Kəramət Böyükçöl: "İstedadımla taksavatlıq edirəm" - Video
17:36 23 Sentyabr 2021
Falçı yetişdirən məktəblərimiz – Aqşin Yenisey yazır...
16:50 23 Sentyabr 2021
Saitlər əsasdır, yoxsa samitlər?
16:14 23 Sentyabr 2021
Yazıçı Səfər Alışarlı: “Azərbaycan sərvət aşiqlərinin ölkəsidir” - Müsahibə
15:33 23 Sentyabr 2021
Məşhur yazıçının əsərindən film çəkildi
14:46 23 Sentyabr 2021
Səyyad Əlizadə sağalır
14:03 23 Sentyabr 2021